啱啱過咗生日嘅我，已經係44歲嘅中坑，自從24歲大學畢業之後，我總共做過20份工，呢個數字只係計full-time，未計以前讀書嗰陣嘅part-time，望返轉頭，原來今年係我踏入社會工作嘅20周年，真係回頭已是百年身。
好多人都轉過工，但未必個個記得轉咗幾多份，我咁肯定自己做過20份工（full-time），全因為我轉工好有規律－－－平均一年轉一份，而每次辭職嘅原因亦只得一個，就係要去旅行！身體裡面隻「旅行蟲」定時定候一定會咬我，好似提醒緊我：「喂，係時候要放低工作去旅行喇！」
每個地方都有佢嘅奧妙，仲有值得探索嘅細節，讀書放暑假嘅時候因為冇乜錢，我去廣州都可以逗留成個月，一般人去嘅地方固然會去啦，我仲要捐窿捐罅去唔算熱門嘅地方，舉個例，大家有冇聽過十三行？就算廣州人知道都未必會去，因為嗰個地方主要係畀人批發入貨，朝早去到左閃右避嗰啲送貨工人，睇完服裝批發市場，又去睇飾物、家品、文具批發舖頭，我真係樂在其中，覺得咁樣先至係深度遊，當然仲有一啲更冷門，只有當地人先知嘅地方啦！
即使好似澳門咁細嘅彈丸之地，我都可以玩足一個月，而且完全唔覺得悶，嗰度好多住宅區嘅橫街窄巷都有寶藏，會搵到隱世美食。
大個返工正式搵錢之後，我就唔再滿足於近距離嘅旅行，開始去歐洲，南美洲，甚至係非洲，最想去而又未去過嘅國家係北韓，因為嗰度只可以跟團，我覺得唔夠喉，不過又冇辦法自由行，所以一直十五十六，你都知啦，去得北韓就預咗要睇一啲佢想你睇到嘅嘢，咁樣唔夠地道。
我唔係冇諗過寓興趣於工作，30歲鬆啲嗰陣，我曾經喺一本旅遊雜誌返工，當時仲流行出書，而家間嘢仲喺度，不過得返社交平台同埋網頁。如我所願有免費旅行，可惜做落先知道不似預期，首先要喺有限時間內去勁多地方，每晚又要趕返酒店寫稿，變相唔可以睇清楚成個國家同埋城市，身體係去咗旅行，實際上又冇去過，總之完全唔係嗰回事啦！
你話我任性又好乜都好，做夠一年儲夠錢就辭職去旅行，已經成為我嘅人生常態，後生覺得無傷大雅，旅行就梗係趁年輕時去㗎啦，老咗邊有氣力同精神探索新領域？不過隨住年紀愈嚟愈大，我遇到嘅問題亦愈嚟愈多，最大嘅分別就係搵工冇後生嗰陣咁輕鬆。
仲係廿零三十歲嘅年紀，拍下屁股話辭職就辭職，旅行返嚟再搵工真係好容易，或者當時市道比而家好啦，肯做又唔太計較人工點都有人請，但自從35歲之後就有啲勉強，過往搵工一擊即中嘅情景不復再，有時要搵兩三個月先至搵到，冇工返嘅空窗期真係好浪費時間，仲要冇收入冇積蓄。
上個月尾我見咗一份工，最後冇請，但個HR語重深長同我講：「嚟緊幾日我哋仲會in人，如果下星期仲未有通知就即係冇，其實你轉咁多份工，張form都填唔晒，有冇諗過長遠嚟講唔係咁好？你呢隻唔係普通Jumpy咁簡單，講真我哋呢個position係contract就無所謂，不過你咁樣搵長工會有難度。」
佢講嘅嘢我梗係明啦！畢竟唔係young喇，我44歲，由於成日轉工，個title一直停留喺好Junior嘅職位，Middle Level同埋Senior唔輪到我，問題係我現時嘅年紀就算搵Junior職位都未必有人請，啲公司搵初級員工傾向請後生仔女，我都知自己冇競爭力。
呢份文職都係搏下㗎咋！我對上兩份工分別係做油站同埋茶餐廳侍應，有時會覺得自己假假地係大學生，搞到咁真係幾無奈，但「旅行蟲」定時定候就咬我，基本上我只要工作一年左右，已經會覺得身痕想辭職旅行，食藥都冇咁準時。
之前咪疫情冇得飛嘅，我癲到就算冇得搭飛機，都要去梅窩同長洲租間屋住一個月，去離島避世當旅行。
好想知有冇人好似我咁？我都好想改變，不過真係改唔到，如果大家有咩方法或者意見，我好樂意傾聽。