我係點樣認識老闆㗎呢？3年幾前，我走咗去讀韓文，落堂之後自己喺附近啲餐廳食飯，落完order但嘢食未到嘅時候，突然有把女人聲喺側邊講咗句：「Hello，妳認唔認得我呀？韓文班呢！妳一個人食飯呀？」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
當時其實已經上咗幾堂韓文，佢認得我都唔出奇，而我就肯定認得佢，因為呢個女人喺班上面明顯係最大年紀最成熟，其他同學仔普遍廿零歲，應該仲有幾個超過30歲，但呢個女人起碼40以上，而且一身名牌，所以點會唔認得吖！
我：「認得，我一個人食飯呀，你又係一個人？」
「係呀，介唔介意一齊坐？會唔會阻住你？」
我：「唔阻呀，請坐吖！」
「好！係喎，上咗幾堂都未知你叫咩名。」佢一路講一路坐低，大家都係女人，我又的確唔介意，何況佢都幾nice！
我：「我叫Cathy，你呢？」
「我叫Sarah，你學韓文係咪因為鍾意睇韓劇呢？」
其實我係咪鍾意睇韓劇並唔重要，最重要係呢位叫Sarah嘅女士，之後會成為我嘅老闆，如果唔係佢，我可能做咗PTGF……講下笑啫，但亦都係因為佢，男朋友真係誤會咗我做PTGF，呢樣就唔係講笑。
呢餐飯之後我哋成為咗韓文堂嘅飯腳，互相交換咗WhatsApp，有時會相約上堂前一齊食，有時就係落堂後先食，我冇嘢做時間自由，反而Sarah係做小生意，佢嘅工作忙好多。
我就晒Sarah鍾意幾時食就幾時食，因為佢每次都請客，我唔係冇試過搶埋單，但次次都唔夠佢爭，因為佢知我當時失業，所以食親飯都會講：「第日你搵到嘢做先啦！又唔係食咩貴嘢，你肯同我食已經好好喇！」
有時Sarah又會咁講：「我大你咁多，你係小妹妹吖嘛，我請你好平常啫！」
雖然大家年齡有一段差距，不過次次食飯都算傾得幾開心，我會同佢講之前公司裁員嘅事，又會講下我男朋友嘅事，Sarah亦會講佢做咩生意，員工點樣激到佢紮紮跳，總之天南地北乜都講一大爛餐。
大約過咗兩個零月，我決定唔再上韓文堂喇，因為我老豆做地盤，有次整親手要休息，一來想多啲照顧老豆，二來我對於讀韓文嘅熱度有啲冷卻，三來就係想的起心肝搵份工，始終老豆嘅工種係手停口停，屋企都有少少經濟負擔。
唔怕老實講，我身邊有個friend係做PTGF，佢知我屋企有困難之後就想介紹我入行，仲講咗好多呢行係點運作同收費嘅基本概念我知，成日強調：「唔一定要上床㗎，你咪淨係揀啲行街睇戲食飯嘅客囉，唔搞嘢係搵少啲，但你勤力啲都ok㗎，你目標又唔係搵十萬八萬，你都搵咗工好耐啦，上次仲話考慮做7仔，不如試下同我一齊做。」
咪玩啦！唔上床齋行街睇戲都唔敢呀，喺街撞到熟人點算呀？更何況男友都識得我呢個friend，亦聽聞過我呢個friend有做PTGF，男友知我哋出去飲嘢已經起勢咁問，疑心勁重，佢覺得呢個friend會教壞我。
人哋講幾句就帶得壞，自己冇思想㗎咩！不過坦白講，我聽完個friend咁講係有少少心動嘅，但要我真係去做……我衝破唔到心理關口呀！自問唔係食呢行飯嘅料子，完全唔具備呢種心理質素。
趁住韓文堂一個周期完結，無心戀戰嘅我就唔再報讀下個階段喇，估唔到Sarah咁大反應：「吓！你唔讀嗱？咁第日邊個同我食飯呀？咪冇咗個飯腳囉！」
我：「車！仲以為你唔捨得我，原來只係怕冇人同你食飯，呢度咁多同學，你又有同事，仲有朋友，大把人同你食啦！」
Sarah：「我唔係個個都傾得埋㗎，好耐之前上第一堂，我有撩當時坐我旁邊個女仔食飯，佢話唔食，我面皮好薄，人哋推咗一次就唔會再問。」
我：「朋友呢？同事呢？你可以放工食埋先過嚟上堂吖！」
Sarah：「同事唔啦！我覺得同啲同事保持返少少距離會好啲，佢哋同老闆食飯都唔聚財啦！朋友……我冇乜。」
當時我唔明點解Sarah會冇朋友，後來先至明白，呢樣容後再講，但佢話自己冇乜朋友嗰個moment，唔知點解我覺得佢好可憐。
我：「呢餐等我畀啦，你都請咗我食好多餐喇！」
Sarah：「呢啲錢唔使同我計啦，本來仲想嗌你星期日出嚟，請你食一間日本餐廳，我想試好耐㗎喇，一個女人去呢啲餐廳好怪㗎！其實你點解讀得好地地唔讀啫？」
我：「我老豆做地盤，之前整親所以未來幾個月開唔到工，我想正正經經搵份嘢做，或者做下7仔先都唔出奇，近排太多事喇，我都冇心機學，返屋企都冇揭開過啲書同筆記。」
Sarah：「咁容易啦，我請你好唔好？」
我：「你公司要人咩？」我開心咗幾秒，可以咁樣搵到份文職又唔錯呀，大家咁投契，應該唔使正式interview啩！
Sarah：「公司就冇位喇，如果我畀錢你同我食飯，陪我試唔同嘅餐廳，你會唔會考慮？」
我：「請我陪你食飯？咩意思？」
其實我潛台詞仲有兩個問題：1）Sarah係唔係鍾意女人？唔通我兜個大圈又係做PTGF？只係客路由男性變咗女性？2）請我食飯定係請我陪你食飯先？如果係陪食飯，唔通你出完飯錢仲畀人工我呀？點計呀？
Sarah：「冇咩意思，食飯就係食飯囉！講真嘅，一個星期出嚟食三次，如果有需要，可能一星期四次，人工就……$12,000 好唔好？出嚟食飯當然由我埋單啦，呢層你唔使擔心，個價錢你點睇？」
單單睇$12,000就唔係一個吸引嘅數字，我上一份工被裁之前都有$19,000，但考慮到工作內容只係陪食飯，咁$12,000就好難拒絕喇，老闆係男人就有戒心啫，老闆係女人唔通會食咗我咩！
我：「$12,000淨係每星期陪食飯三次？」
Sarah：「係呀，咁我都有啲要求嘅，食咩我揀，食飯期間盡量唔好有悶場，仲有，星期五六日一定要出嚟食。」
我：「如果真係咁簡單，我ok呀？不過……你唔好玩我喎，我好認真想搵工㗎喎！」
Sarah：「點會玩你呀？月結ok有冇問題？當出糧咁樣，每個月1號畀錢你。」
其實我自己係好enjoy一個人食飯，冇人煩又可以睇下片、上上網、放一放空，咁樣食飯唔係仲舒服咩？
不過咁，女仔想有人陪食飯都可以理解，我舊公司直頭有啲女仔連去廁所都要有人陪，你有冇見過呢種女同事吖？我見過，我真係見過。
我嘅諗法係，呢$12,000絕對係easy money，我搵多份正職或者兼職都仲得，所以最終take咗呢個offer，心態上就當係freelance job。
緊接落嚟我真係開始陪Sarah食飯，連續兩個禮拜都係星期五六日出去，搞到男朋友詐型同埋懷疑：「你唔係走咗去做PTGF呀？點解weekend例牌唔得閒？有咩搞呀你？」
男友就唔理佢先啦，重點係我慢慢地了解Sarah，明白佢搵「職業飯腳」嘅原因，更加明白佢點解搵唔到朋友一齊食飯，要搞到出錢請我。（未完待續）
【職場信箱】最唔尊重求職者行為，CV掉垃圾桶、見工見到失蹤、食住煙interview乜都齊！
