見工嘅地點係灣仔某連鎖咖啡店，In我嘅人就包括HR同個老闆。
「Hello，我係約你interview嘅Carrie，呢位係徐生。」
徐生好nice，佢隨即同我講：「叫我Eric得㗎喇，知唔知點解會約你喺呢度interview？」
我：「唔想其他同事知公司做緊招聘？」照計唔係對呢間cafe有特別感情啩！
徐生：「唔係，我哋公司冇租office，即係冇辦公室。」
我跌入沉思，連帶問返佢：「但我睇過你公司website，記得有office地址。」
徐生：「嗰個係租嚟收信同埋做商業登記，其實幾年前我哋有實體office，不過後來業主加租，仲要加得好離譜，嬲嬲地咪唔租囉，冇幾耐就疫情喇，我打聽過呀，最後個業主要減價先租得出，抵佢死吖！我都唔怕同你講，我有反社會人格。」
我聽緊啲乜？王子復仇記？呢個interview歷時一小時零十五分鐘，當中只有十五分鐘係我講嘢，另外嗰一粒鐘就係聽徐生發表「經濟偉論」。
徐生：「啲樓價咁離地，租又唔合理，有冇諗過除咗一啲要廠房生產嘅business之外，其他公司係可以唔租office呢？」
我：「Er……其實而家好多公司都係遙距辦公嘅。」最穩陣係咁答啦！
徐生：「唔多呀！疫情後又全部返晒office，我明白冇辦公室係唔似樣，但好多行業根本唔需要接客，起碼8成時間係用電話同email溝通，真係要見或者開會咪出去搵地方囉，好似而家interview喺cafe又得，正統啲租幾個鐘wework嗰類又得，再唔係食餐飯傾都得㗎啫，唔使下下長租實體辦公室㗎！只要一大堆公司唔租，個價自然會因應市場下調，點解要畀發展商同業主牽住個鼻走啫？」
呀徐生真係反社會人格，佢唔係扮……
雖然interview有3分2以上時間係聽徐生反對捱貴租嘅「願景」，但出乎意料嘅係……佢哋請咗我。
真心，冇office嘅公司感覺好唔實在，雖然當日喺cafe見工有順便填埋form，但係咪有糧出㗎？只係我忘記咗一件更加重要嘅事，就係自己已經失業一段時間，某程度上係冇得揀，一係搏，一係繼續搵工……其實有搵，不過冇回音啫！
接受offer返咗工又冇想像中咁差，首先工作內容好認真，有啲同事係幾有料，其次係每日至少4至5個鐘開住zoom傾嘢做嘢，遙距辦公都冇揸流灘，中間好多break，大家就咁行開同mute聲就算（徐生要求開鏡頭）。
用zoom開會同工作嘅氣氛都好easy，有同事直頭喺鏡頭前食煙，有同事係咁食零食，有同事抱住隻貓傾嘢，睇得出各自喺屋企好自在，唯獨其中一個同事將電視開到好大聲，呢下有少少影響，不過徐生都冇話佢，我當然唔會叫佢較細聲啲啦！
而家做咗三個半月，已經好習慣呢種工作模式，其實有冇office唔係最重要，有冇糧出先係最重要吖嘛！佢哋出糧好準時，完全冇問題，徐生新年仲請大家去酒店食開工飯，佢話冇實體辦公室慳好多燈油火蠟，將啲錢交貴租益業主，不如用喺同事身上，食好啲又得，之後人工加多啲又得。
最大嘅壓力反而來自我老母，老人家睇唔慣呢種工作模式，係咁話我份工唔正經，日日嘈我真係好煩，考慮過出去搵地方做嘢，但一來唔想增加支出，二來平時開zoom要講嘢，喺街始終唔方便。
點都好，我愈嚟愈鍾意呢份工，亦愈嚟愈欣賞老闆嘅反社會人格，係就係激啲，但呢份「革命精神」我係佩服嘅。