「今晚食咩？」
「你揸主意囉！」
「想食類似避風塘炒嘢嗰啲，點吖？」
「無所謂呀，我乜都食嘅！」
以上唔係情侶對話，而係我同老細嘅對話，我係男人，佢都係，唔存在任何感情關係（包括愈男愈愛），我哋純粹食飯，平均每星期3至4餐，其實一個星期都係得7日……好在老細唔食lunch，佢一日只食一餐，否則隨時每星期陪食10次。
我老細係一個好怕寂寞嘅人，佢話自己由細到大都唔習慣一個人食飯，總之單拖入餐廳就會周身唔聚財，覺得人哋眼望望，如果買外賣返屋企又會有好可憐嘅感覺，所以老細開頭係日日嗌不同嘅同事陪食飯，咁當然女同事就比較避嫌，費事引人講閒話，主力由男同事陪佢食，久而久之大家都唔去喇，始終打份工，雖然次次由老細埋單，咁都係佔用咗私人時間吖嘛！
最初我係俾面派對心態，後來知道老細係因為太太幾年前過咗身，佢雙親又已經走咗好耐，冇兄弟姊妹，而家得返佢一個孤伶伶，我係有啲覺得佢可憐嘅。
曾經問過佢點解唔再搵個伴，老細只係58歲啫，又有錢，你唔再婚都可以溝女吖，留精不留情，又或者食飯唔爆房都得啩！不過佢咁答：「硬係覺得老婆走咗之後會睇住我，唔想做啲令佢唔開心嘅嘢。」嘩！好在我係仔，係女真係畀你感動到。
我冇乜所謂，佢每星期梗有一兩餐食得好豪，有時又會去連鎖快餐店食下小菜同焗豬，都幾飄忽，總之食平食貴都係佢畀錢啦！
小弟我結咗婚㗎喇，老細有嗌埋我老婆一齊食，嗰次仲要食日本嘢勁貴，但老婆覺得我老細好煩，成餐飯係咁講嘢，所以跟咗一次就唔再去，不過老婆好歡迎我陪老細食，一來佢唔使煮我飯，覺得生活仲輕鬆，二來老婆話做到老細心腹都唔錯喎，對事業發展有著數。
講真著數我就唔多覺，因為公司啲人已經梗晒局，再心腹都冇position畀我升，人工亦唔見得厚待我，不過食飯啫，ok啦！年中慳咁多餐，有機會去啲高級餐廳咪當開下眼界囉！
真心問，如果大家有個咁嘅老細，你又肯唔肯每星期陪佢食幾餐呢？