「可唔可以幫我叫阿Leung辭職？你同佢解釋吓，大家唔夾都係做得辛苦，無謂日日嘈啦！篤眼篤鼻係咪先？唔係淨係我睇佢唔順眼呀！佢都睇我唔順眼啦！咁樣返工盞大家冇癮，啱唔啱呀？與其係咁，不如撇脫啲，佢遞信畀我，即批，搞掂！」老細煞有介事咁拉我埋一邊講咗呢番說話。
我：「你講得好有道理呀！咁不如你直接同阿Leung講啦！你叫我同佢講做咩啫？傳聲筒咁樣咪仲多誤會。」老細想我勸呢位叫阿Leung嘅同事自己辭職，不過我無辜㗎喎，又唔係同阿Leung特別熟，你當我係談判專家？自己同人講啦……雖然佢已經講過。
「佢肯自己辭職，我就唔使搵你幫口啦！」
我：「咁如果佢唔肯自己辭職，你搵我傳達都冇用，你搵個女同事用美人計仲好啦！你覺得佢會聽我講？」
老細想炒阿Leung已經好耐㗎喇，唔係用一兩件事可以做總結，因為佢兩個嘅芥蒂係日積月累，不過引爆點係早排老細當住咁多人面前爆阿Leung：「你係唔係唔想做啫？冇問題呀！你辭職吖嘛！」
最正係阿Leung當眾答返佢：「我點解要自己辭職呀？你想我走咪直接炒我囉！」
其實都唔需要解釋個分別喺邊，公司炒你，賠一個月人工，你自己遞信，一係坐足30日，一係賠錢畀公司早走。
至於咩reference letter會寫衰你嘅問題，主要係睇當事人有幾介意，阿Leung可以咁霸氣，應該一早有自己嘅打算同埋後著，所以佢並唔care咩reference letter，佢寧願老細炒佢賠一個月，目標好明確，阿Leung要錢，唔需要面。
佢兩個喺公司真係由朝嘈到晚，有時我哋呢啲塘邊鶴同事都好難做，總之佢哋嘈交就唔出聲，仲要唔好喺呢個時候call客，因為有幾次都係粗口橫飛，我都費事嚇親啲client。
老細係咁求我向阿Leung講辭職嘅好處，咁我就搬字過紙有嗰句講嗰句。
我：「阿Leung，老細叫我叫你辭職，我轉達㗎啫！」
阿Leung：「痴L線，我唔會自己辭職，總之佢想我走就主動炒我，係咁簡單。」
我cut走啲粗口之後，將阿Leung講嘅說話轉告老細：「佢話總之唔會自己走，等你炒。」
老細：「我唔想益佢喎！無啦啦要我賠一個月人工，咁佢咪好發？」
我：「你啱啱講呢句使唔使我轉達？」
老細：「唔使！我同你呻啫！你唔好比佢知我唔想賠一個月人工，一係咁，我想你哋成班同事幫幫手，大家一齊冷淡啲對阿Leung，等佢自己唔開心知難而退，迫佢遞信。」
老細堅係嚟搞笑㗎喎！唔通你唔講，阿Leung就唔知你想炒人又唔想賠人工咩？我呢啲旁觀者都睇得出啦！同埋大家幾多歲人呀？小學生呀？叫同事出面玩杯葛咁低手，唔好癲啦！
不過老細原來都有叫其他同事勸阿Leung辭職，其實阿Leung份糧都係兩萬幾蚊啫，你唔想見到佢咪自己落刀囉，又唔係要賠二十幾萬！
後來有個同事又真係走去勸阿Leung，然後再覆返老細：「阿Leung話你係死窮X喎！冇錢學人炒人。」我真係笑咗出嚟，照轉達當然冇問題啦！會唔會修飾下先呀？
結果呢場大戰眾望所歸，老細忍耐力唔夠，最終都係賠錢畀阿Leung走，即日生效，阿Leung可以話係求仁得仁。不過最估唔到嘅係，原來阿Leung係冇叫過老細做死窮X，係嗰位同事自己加插落去。
我：「點解你假傳聖旨？唔驚老細拎住呢個位同阿Leung嘈？」
同事：「驚咩吖！咁佢真係死窮X吖嘛，你估阿Leung個心冇咁諗咩！老細日日叫我氹阿Leung走，仲問我阿Leung有冇做錯嘢，想捉錯處炒人唔賠錢，出埋啲咁嘅嗱喳招！」
不過呢件事令我覺得老細好多嗱喳招，將來如果我resign真係要小心啲。