之前見到有篇投稿話個老細赤裸上身，喺office行出行入，如果有得揀我寧願咁呀，因為最多唔望㗎啫，就算見到又點？其實都影響唔到工作，反而我個老細就真係擾民喇，條友係會開「恆」音量喺office播粵曲，聽覺唔同視覺呀，啲粵曲大大聲轟落嚟真係集中唔到精神㗎！
再形容下老細播粵曲嘅音量，大家有冇試過睇演唱會，仲要坐得比較前排？現場啲音量咪好大聲嘅，有時係會feel到個地下都震㗎嘛！我老細喺office播粵曲就係咁上下喇，我真係feel到震㗎！所以每日返工都覺得好困擾。
每個人對噪音嘅接受程度都唔同，有啲人可以當冇事，有啲人根本就習慣聽住歌做嘢，不過我唔得，如果份工係返夜場同酒吧之類，當然係預咗會好嘈啦！問題係我返緊一份文職工作吖嘛，又要開單又要計數，做錯嘢係咪可以免責先？
唔習慣一路聽歌一路做嘢嘅我，已經嘗試過退一步，用耳機聽其他嘢希望耳根清靜，無奈啲類似cafe music嘅音樂又太細聲，依然聽到office啲粵曲，咁是L但啦，橫死掂死，我直頭揀謝霆鋒啲《活著Viva》同埋《400 gig》㗎喇，頂你個肺咁都遮唔盡啲粵曲聲，係咪我嘅AirPod太廢呢？咁都冇理由下下開到最大聲傷自己耳膜吖！
問過啲同事點解咁樣都頂得順，佢哋話慣咗喎！慣？咁大聲都有得慣？個地下震㗎喎！其實我公司得十幾人，聽返佢哋講，的確曾經有人因為頂唔順咁嘈嘅工作環境而辭職，我就唔好彩啦！見工嘅時候老細出咗trip，當時完全意識唔到工作環境係咁嘈，否則一定唔會接受呢個offer！
本身我做咗兩個半月左右都心大心細打算放棄，自問頂唔順，有時會有種感覺係盂蘭節去咗嗰啲球場睇神功戲，既然係咁，倒不如灑脫啲趁試用期之前走，好在事件最後終於有轉機，因為樓下個管理員叔叔上門，佢話呢棟工廈有唔止一間公司租戶投訴，勸喻我哋將音量收細。
「鄧生，唔好意思呀，好多租戶投訴你哋音樂好大聲喎，幫幫手閂細啲好唔好？」呢位管理員叔叔都算客氣。
老細：「乜嘢呀，之前一直都係咁㗎啦！都冇人投訴，有新租戶咩？邊間呀？我哋呢層定係樓上樓下？」
「樓上樓下都有呀！有個話要報警，一個話要搵大業主傾，有個仲話搵咩張撈屍，如果係咁好麻煩㗎，幫幫手啦鄧生！」
老細：「咩係張撈屍？」
因為我一路聽住管理員叔叔同老細講嘢，所以搭咗句嘴：「佢應該係講Channel C，好紅嘅YouTube頻道，如果有人投訴會主動聯絡你拍攝同埋訪問。」
真係好老實講句，我都唔明之前點解會冇人投訴，我哋同一層仲有兩個單位，雖然嗰啲唔係咩大公司啫，但你正常人點忍呀？究竟係咪得我一個忍耐力咁低呢？
老細一聽到會有人上門拍攝同埋訪問，嗰種氣焰就開始消失，梗係啦！如果因為呢啲事令到佢或者公司出晒名，到時會好瘀㗎嘛！
呢個時候亦開始有同事講返句人話：「細聲啲囉！如果有人上嚟拍嘢我唔接受訪問㗎！唔好搞呢啲嘢呀！」
另一個同事就話：「咪係！成日話打格仔打格仔，識得你嘅人實會認到㗎！畀啲friend見到我仲得掂嘅！我好多friend都成日睇YouTube㗎！」
謝天謝地嘅係，管理員叔叔走咗之後，老細即刻熄咗啲粵曲……半晝咁多，雖然第二日佢都係繼續播，但係而家終於識得用耳機自己聽喇，一早就要啦！迫同事聽粵曲，你冇嘢呀？我諗羅家英同阿姐都冇你咁鍾意聽粵曲呀！
後來有同事話我好叻，管理員叔叔滿口鄉音話張撈屍，我都估得到係Channel C，屌！叻咩吖……其實啲投訴電話係我叫自己啲朋友打去㗎！搵兩個女仔friend幫我打去管理處話係樓上樓下，我仲provide埋啲公司名畀佢哋開名，然後又搵個男仔friend扮係同一層另一間公司投訴，一連兩日瘋狂轟炸管理處，又話報警又話搵大業主，管理員叔叔咪冇得唔理囉！所以我點會唔知咩係張撈屍呀！
同事唔會知係我搞出嚟，我亦都唔打算講，而家啱啱過試用期咋，容乜易有人向老細報寸話係我自編自導自演投訴事件，不過呢班同事應該要多謝我啦！好人好姐日日畀粵曲以高分貝轟炸，邊個會鍾意呀！
戴返個頭盔先，唔係話粵曲難聽，只係我老細播得太大聲，連撻地都震埋喎，嗰陣時公司真係嘈過地盤㗎！