失咗業3個月，我都數唔到自己send咗幾多份CV出去喇，第一個月約見工嘅次數係－－－0，第二個月好啲，叫做有HR打電話嚟問幾句，但真係約時間interview嘅得一間公司，嗰陣直頭懷疑自己係咪已經被社會淘汰。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
或者請人都有分旺季淡季啩，去到失業第3個月，開始陸續有人打嚟約我去見工喇，total見咗5份，為免混亂，以下會用ABCD去區分，A公司係最快出offer畀我，由於當時我係唔知道仲有BCD公司會confirm offer請我，所以就嗱嗱聲答應A公司先。
有啲嘢就係咁邪，失業初期我日日send CV都冇回音，日日等電話連震機都唔敢較，偏偏就叫天不應，叫地不聞，返咗A公司兩日，我記得食完lunch之後收到個電話，係B公司打嚟confirm offer！
當時我諗都冇諗就答應咗，因為A公司成個氣氛好冷漠，我返咗兩日工，係完全冇人理我㗎，兩日嘅lunch都係自己食，同事同我講嘢加埋應該冇廿句，最長嗰句係當我問個阿姐：「Hello，有冇嘢可以幫到手呀？」
個阿姐咁答：「冇，你睇下公司啲leaflet先啦，我忙緊，其他人都忙緊，佢哋得閒嘅時候會教你㗎喇，睇leaflet啦！」
而阿姐口中嘅leaflet，只係得一張A4紙對褶埋，前後4版，有一版封面仲要係得一幅圖……
嗰啲咩welcome lunch就更加冇，其他department我當然唔知，但淨係計我條team，5個同事加埋個阿姐有6個人，佢哋自己都係分開出去食lunch，咁當然我唔係小學雞，一定要有人陪食晏，只係佢哋亦唔會問你或者關心下你出唔出去食，完全由得我自生自滅。
如是者，當我第二日都係自己食完lunch返公司嗰陣，收到B公司打嚟confirm offer，我係冇半點猶豫就應承，同日向A公司辭職，好在咋！否則份leaflet睇到穿都仲未有人得閒理我。
唔知係咪有對比呢，B公司啲人真係正常好多，會講笑，會傾計，唔止一齊食lunch，佢哋仲好似有好多節目，已經叫定我之後join，然後返咗3日，我收到C公司電話，又係打嚟confirm offer，咩事呀？瘦田冇人耕，耕開有人爭？
B公司好地地咪安守本份囉，係㗎！我本來係咁諗，不過C公司開出嚟嘅人工係高過B公司$2,000，都未算，C公司仲要勁近我屋企，我屋企樓下有架小巴會去到，搭一程都係幾蚊，如果天氣唔熱嗰陣行返去都應該幾舒服。
由於C公司人工同地點比較好，我心思思，但又唔想放棄B公司，所以我諗咗個自己都覺得好仆街嘅方法，就係……請一日假自製「試工」，如果係C公司真係咁好，唯有向B公司辭職啦，打工仔都係求財同埋求便利啫！
我同B公司個manager講，好耐之前喺醫院約咗個body check，因為排期係大半年前，完全唔記得咗係下星期，所以想請一日假。
B公司個Manager：「去吖，呢啲你唔去又要再排過㗎喇，趁啱啱返工唔係好多嘢做，你請一日假去都好呀！」
痴線，B公司個manager勁好人囉！其實A公司個阿姐亦唔可以話係差，只係佢哋好冷漠啫，但B公司實在太好喇！
跟住請假去返C公司，我都擔心過一日時間係冇可能睇清楚，點知個天又對我不薄，返一日工我已經見到好多嘢，首先C公司同事第一日同我食welcome lunch，係順道同佢哋另一位同事食farewell lunch，跟住有個女同事仲要同我講：「下星期仲有一餐，到時係我走！」
即係短時間內走兩個？
最頂癮係食完個lunch之後，C公司個女上司捉住我行返公司，佢明顯係刻意唔畀我同其他同事痴得咁埋，我都唔使自己問，個女上司已經同我講：「你唔好群佢哋咁多，呢幾個同事嚟緊都會走㗎喇，到時除咗我之外，你就係成個department最senior嗰個，少啲同佢哋一齊放負，你做好自己嘢就得，有咩唔明問我。」
睇嚟有啲嘢喎！好可惜我冇時間再「調查」喇，我有啲掛住B公司，雖然C公司人工多$2,000，地點又近我屋企，但係我咁睇，如果份工做唔長，人工再多都賺唔得耐啦！
任性地憑直覺做決定，臨放工同C公司講唔適合，第二日當冇事再返B公司。
我想講呢，B公司啲同事仲好到係咁關心我個body check，又問有冇咩事，又問係咪要等結果等報告，唔係一個半個人問喎，係同部門幾個都有關心我，當時我就更加內疚，直頭有種自己出咗去勾佬紅杏出牆嘅感覺。
但又喺呢個時候，我收到D公司打嚟嘅電話，同樣係我之前見過嘅其中一份工，唯一唔同嘅係，對方HR喺電話裡面咁講……
D公司HR：「我哋決定請你喇，你下星期一返工有冇問題？不過想同你講咗先，老細覺得你喺經驗上唔算好多，所以人工方面畀唔到你要求咁多，我睇下你寫幾多先……你expected salary係$24,000，我哋會offer $22,000，有冇問題？」
我：「梗係有問題啦，唔使喇，我搵到工，bye bye！」跟住直接cut線。
唔好玩啦！唔計B公司，A同C公司都冇壓我價，你間D公司一打嚟已經想撳我，係咁先啦！（完）
突然有咁多offer真係好幸福，呢單等咗8個月先有回音呀！
面試長達8個月先有offer 我都已經搬埋去倫敦
https://hkofficedaily.com/?p=16483