個天有時都幾公平，公司上年年尾請咗個靚女sales，真係junior妹妹仔一名，其實佢靚到可以直接喺娛樂圈出道，好多同事都問佢點解唔去做明星或者model，唔止男同事咁問㗎，女同事都會問佢，不過呢，靚女sales做嘢就真係麻麻地，佢好似係公司史上唯一一個返咗兩個月都開唔到單嘅sales。
除咗生意差，平時嘅文書工作亦都多甩漏，英文grammar錯到飛天就算喇，我自己英文都唔係話好好，只係呀靚女錯得更離譜，而且佢唔止一次個上款打錯客人個名，例如人哋叫阿Sam，佢竟然可以打咗Peter，問佢點解會打錯，佢話剛剛同另一個叫Peter嘅客講完電話，個腦一時轉唔切喎……咁都得？
記得頭兩個月我哋班同事已經係咁幫靚女執屎，報價錯、交貨日期錯、item嘅description錯、item code錯，我未見過女仔可以粗心大意到呢個程度，其實男仔甩漏到咁亦好少見，仲要講完一次，隔幾日又犯同樣嘅錯誤，最慘係你覺得佢已經盡咗力，只可以講句，靚女sales可能唔適合做呢行，不如去做model或者拍戲啦，文職工耽誤咗佢呀！
當時見仲有一個月先過試用期，我哋個team head已經想忍痛唔畀佢過，雖然office裡面少咗個靚女係會打擊士氣，但係大家真係唔想孭住呢個包袱喇，尤其係我哋sales team呢邊，老細set落嚟嘅sales target都真係要追，長期讓半臂有一個sales冇數返只會攬炒。
喺team head猶疑緊幾時炒靚女嘅期間，我哋唯有畀啲跟單嘢呢位靚女sales follow住先，係有少少投閒置散feel，不過對內就始終好過對外，因為之前派畀靚女跟嘅幾個客都先後有投訴，再係咁落去都唔係辦法。
嗰陣公司咁啱搞緊一個event，廣邀客人同埋supplier出席個活動，跟住就犀利喇，所有嘢都出現翻天覆地嘅轉變，因為靚女sales當時都有份喺個event招呼客人，其中有個叫阿Sam嘅客直頭兜口兜面對住靚女sales講：「嘩，乜原來你咁靚㗎！平時淨係同你用電話溝通，而家見到真人個感覺好唔同喎！
呢個叫阿Sam嘅客，之前咪就係畀靚女send email叫錯Peter囉！阿Sam仲好嬲咁樣投訴，而家見到真人之後就乜都唔記得晒喇，成個event仲係咁同呀靚女sales吹水，我諗之後叫佢阿Paul, David，或者Tom都冇所謂喇！
「臣服」於靚女sales美貌之下嘅唔止阿Sam, 同場仲有幾個客都係咁樣，有啲著跡啲好似狗公咁，有啲就比較含蓄匿喺遠處觀察，唔少客人更加私底下問我哋其他同事：「條女幾正喎！Sales嚟㗎？」「呢個係請返嚟嘅model定係你哋正式員工呀？」「 嗰個女仔叫咩名呀？做咗好耐㗎喇？」
當然啦，就咁口頭讚美係好廉價，所以好多客都有實際行動，就講嗰個阿Sam，以前做佢一單生意要來來回回幾廿封email，又講價又講數期，但係自從公司個event之後，阿Sam每張單都係一take過，唔使discount喇，regular price就得，而且啲order係多咗同埋銀碼大咗。
另一個客仲好笑，event之後同靚女sales落單，呀靚女保持一貫水準，覆錯船期同錯item number，最後個客竟然調返轉向佢道歉……
「唔好意思，應該係我之前落單講得唔清楚，唔關你事㗎！冇問題！呢批貨我哋第四季都啱使，唔急唔急！」男人真係好現實，靚女就乜都得。
原本諗住唔畀人過試用期嘅team head最終動搖，佢覺得靚女sales就算當花瓶咁擺喺度都好有用，因為靚女根本咩都冇做（正確嚟講係有做，不過keep住做錯），啲單都會自動波咁湧埋嚟，雖然又未誇張到變咗top sales，但係返嘅數都好亮眼。
「嘩！淨係得個樣都有咁嘅成績，如果肯做肯學有進步咪不得了！」team head當時係咁講，然後加人工畀靚女過試用期。
其實好明顯㗎，只要個客係男，又只要見過靚女sales個樣，後期就自然會增加訂單量，佢哋淨係想keep住同靚女溝通，得閒上嚟visit見一見，總之想繼續有往來。
不過你想留住人咋喎！唔等於人哋想做。靚女幾個月前辭咗職，因為佢有add我哋個別同事嘅IG，人哋同男友飛咗去巴黎睇奧運呀！據聞佢條仔好有錢，咁都睇得出嘅，睇奧運期間book咗間唔知酒店定bnb係對正巴黎鐵塔view食早餐，平時啲ig post又係坐跑車食好西，張枱永遠不經意擺個名牌袋喺隔籬，成個人生贏家咁。
雖然靚女sales走咗，但佢之前積落嘅單真係唔少，強烈建議將來再請啲高質靚女返嚟，公司裡面有一兩個人可以顏值擔當，點計都係一件好事。