喺Linkedin收到個獵頭嘅msg，禮貌覆返佢暫時無意轉工，畢竟都11月年尾啦！
個獵頭不斷遊說，係咁話有份工好好，提議大家電話傾傾先，Ok！聽下冇壞，只係傾落發現個獵頭遊花園，重複呢份工福利好，前景好，問咗幾次關於薪酬嘅問題都避而不談。
我：「咁即係幾錢人工？」
「間公司好正㗎！有乒乓波枱，我上過去呀，見到佢哋有同事打緊乒乓波，仲有紅牛同益力多任飲！」
我：「我唔打乒乓波，咁即係幾錢人工？」
「人工方面呢……佢哋最多畀到24000！年尾會按表現出花紅！」
我：「我而家36000喎！花紅最少一個月，唔使按表現，另外有雙糧。雖然你未有我份CV，不過Linkedin都見到我年資，我諗你應該搵個junior少少。」教埋佢搵人，唔好亂石投林。
「但如果你有表現，我相信會慢慢加上去㗎喇！呢份工真係好正㗎，pantry有兩部雪櫃，微波爐都三個，lunch叮飯盒唔使排隊！」
我：「我唔帶飯，你意思係我應該放棄本身份工，每個月賺少12000，再搏表現，到時慢慢追返我而家呢份糧嘅level？」
個獵頭靜咗一陣，以為佢會知難而退收皮啦，點知佢再重複：「不過間公司好正喎，紅牛益力多任飲！」
我想寸佢係咪好鍾意飲益力多，不過算啦，佢都係職責所在要sell我轉工啫！
經驗之談，一間公司愈多呢啲娛樂就愈惡做，反映員工會喺公司留好長時間，返工嘅嘢，準時收工，準時出糧先係重點，唔好再用乒乓波，紅牛同益力多做selling point喇！