有下屬向我辭職，雖然佢上年先入嚟做，但其實呢個後生仔幾醒目，咁我循例都要問下係咩原因遞信。
「阿爸阿媽想我做政府工，唔好意思，佢哋日哦夜哦真係好煩。」
我：「你有政府工offer？」
「未！佢哋想我喺屋企溫下書，話要多啲時間準備。」
我：「準備啲咩要辭工？」
「因為政府工要考試，基本法要考，又有啲綜合試同筆試。」
我：「冇留意開政府工，你講完我都唔明，anyway，即係你辭咗份工讀書？有需要咩？咪放工溫囉！唔係唔畀你resign，有好路數唔會阻你，但而家又唔係有offer，咁早辭職？」
「 唉，我阿爸講嘢好難聽㗎，佢話政府工起薪點高，福利又多，話我返細公司係浪費時間，不如溫下書應付考試。」
我：「你阿爸阿媽做政府工？」
「唔係啦！佢哋都想，阿爸話曾經考過，但考唔到，我阿媽就學歷唔夠，所以佢哋先至咁想我做政府工。」
我：「得罪問句，咁你阿爸阿媽係咪各自嘅事業好成功？公司高層？定係有自己business？」
「冇冇冇！阿爸揸車，阿媽好耐冇做嘢㗎喇，全職家庭主婦，所以咪咁多時間煩我囉，隔日講一次咁滯。」
我：「如果有冒犯唔好意思，有啲嘢佢哋自己唔成功，點解會覺得自己嘅仔女可以幫手達成呢？如果你阿爸阿媽係成功人士，你跟佢哋嘅經驗同方程式去做冇問題，你都睇波吖，德國、巴西、阿根廷同你分享世界盃攞冠軍心得，ok㗎！而家係中國教你點樣攞世界盃，你唔覺得好好笑咩？我都戴返個頭盔先，所有父母都偉大嘅，我明！你返去諗多一日，真係要辭職考政府工唔阻你，但你思考多一日先，好冇？」
冇人覺得呢種情況好奇怪咩？我都想做醫生律師，如果仔女自己揀呢條路又做得到，我梗係開心啦，但啲仔女係我生嘅，基因一樣，點解我做唔到又會想啲仔女做到呢？
我絕對冇心阻撓佢辭職，都唔係教人做忤逆仔，只係想講出個人睇法。而家過咗一個星期喇，呢位下屬冇再遞信畀我，希望佢諗清楚啦，不過如果佢堅持要走，我係會接受，始終人各有志。