上星期喺街遇見一位舊同事，講真我以為自己撞鬼，點解佢仲在生？
呢位舊同事叫Nicholas，佢當年係隔籬team嘅人，雖然大家唔熟，但始終喺同一間公司共事咗幾年，所以實會認得。
Nicholas走嘅時候話自己患癌，醫生向佢表示只係剩返3個月命，公司好多人聽到都唔開心，記得我哋仲問過Nicholas嘅直屬阿頭有冇嘢幫忙，例如有冇計劃約埋探病，甚至之後做帛金嘅事宜。
其實Nicholas辭職已經超過3年，如果當時醫生話佢得返3個月命，而家仲生勾勾即係代表戰勝病魔……我真係咁樣諗，所以驚咗幾秒就平靜落嚟，日光日白，個商場又咁多人，使乜自己嚇自己吖！我主動行埋去say hi，想慰問同了解下Nicholas現況，點知一行近佢就箭步離開，明明大家有眼神接觸，佢明顯認得我，竟然連招呼都唔想打？
後來我返公司提起撞見Nicholas，仲好開心咁話佢未死，跟住佢部門嘅同事先至講，當年一早知Nicholas冇病，因為佢離職後去咗我哋嘅competitor公司做，有行家爆咗畀Nicholas嘅直屬阿頭知，再隔幾個月之後，唔知Nicholas又因咩事離開嗰間competitor，再去見另一份新工。
我：「佢轉完工再轉工你哋都知？咁多線眼？」
Nicholas部門同事：「唔使線眼，有間公司send email過嚟想做reference check，阿頭真係幾好人，照填張form send返去。其實Nicholas話自己患癌係冇提供任何醫療文件，不過阿頭當時話冇人會咒自己病，下下要拎證明就好無癮……算啦，阿頭善良啫，否則後來都唔會再幫手做reference check。」
轉份工啫，點解要咒自己有絕症呀？
原來Nicholas當年想跳槽去competitor，人哋公司要佢即刻返工，但又唔肯幫手賠一個月代通知金，所以Nicholas話自己剩返3個月命想辭職，要求公司無條件畀佢提早走。
為咗辭職唔賠錢，真係去到好盡。