幾個月前，有個headhunt打嚟話有份工好適合我，大家傾咗幾次，佢終於同我confirm時間見工：「聽晚9:30得唔得？轉頭send地址畀你，好易去㗎，我會喺email寫埋港鐵邊個出口，你出啱其實行3至4分鐘就到，馬路都唔使過。」
雖然個headhunt一輪嘴講咗好多嘢，不過我最在意係佢好似講錯時間：「聽晚9:30？你意思係聽朝9:30係咪？咁急請唔切假喎！」點知個headhunt好快就答返我：「No！唔係朝早9:30，係夜晚9:30呀，你唔好搞錯時間喎！你朝早9:30去到冇人得閒招呼你㗎！」
我心諗係咪玩嘢呀？坦白講放工後去interview唔係未試過，但一般都係傍晚6點至7點咁上下，有機會係好似我呢種candidate咁，唔方便請假，又或者人哋公司office hour好忙，After 6先見就雙贏，不過你而家講緊9:30喎！我放工要搵間餐廳食埋飯先嚟，何況三唔識七咁夜上人公司。
我：「咁夜？諗諗再覆你，始終一個女仔……」
Headhunt：「驚咩吖！唔通佢食咗你咩！我會keep住call你㗎嘛！有咩事最多即刻幫你報警，講笑咋！個客間公司好大㗎！到時幾廿人喺度，真係唔使驚！如果你嫌聽晚9:30太夜，一係後晚，後晚我個客可以9點。」
我：「9點同9點半差幾遠呀？重點係夜晚，佢咁夜叫人見工，又咁夜都咁多人喺office，即係呢間公司OT好甘啦！」
Headhunt：「妹妹仔，你要換位思考，試諗下，一間公司咁多嘢做即係代表咩？代表好生意囉！咁嘅時勢梗係搵間好生意嘅公司啦！你搵啲冇嘢做嘅公司，做一陣就執笠，又或者幾年冇人工加，咁咪仲弊！」
我：「講係咁講啫，你畀我考慮下啦！如果後日office hour得唔得呀？最多我聽日返公司請定假。」
Headhunt：「傻豬嚟嘅，你遇到良心公司喇，唔好走寶呀！」
我：「晚晚OT到9點幾都叫良心公司？你hard sell都有個譜吖！」
Headhunt：「頭先咪教咗你換位思考囉！好多candidate因為見工要請假，有啲仲要犧牲自己嘅大假，就算扮病請sick leave都煩啦！而家呢間公司將interview擺到夜晚9點半，你連假都唔使請就有得見工，仲唔係良心公司？喂，唔係份份工見完一定請㗎！如果佢唔請，你又浪費一日假，咁樣好唔抵㗎嘛！咁當然啦！我好有信心佢哋會請你。」
我覺得呢位headhunt好好口才，就算佢唔做獵頭而走去賣車、賣樓、賣零件、賣衫，甚至係賣電話殼，相信佢一樣會撈得好掂，而我最後亦不敵呢位headhunt嘅三寸不爛之舌，答應咗第二晚嘅9:30去見工。
慶幸嘅係見工過程尚算順利，interview之後等咗一個星期左右已經confirm offer，但我其實中途曾經想放棄，因為呢份工真係好多OT，正確嚟講係冇一日唔使OT先至啱！
Headhunt：「你冷靜啲先，停一停，諗一諗，我講多樣嘢畀你聽。」
在情在理，打算resign之前搵一搵個headhunt，原意係想佢幫我搵另一份工，點知佢話要爆料畀我聽。
我：「講咩都冇用啦！我真係晚晚9點幾先有得收工。」
Headhunt：「你知唔知個Manager同我講咩？佢話你救返成間公司呀！」
我：「你唔好咁誇張啦！我呢啲Junior打雜位，點救返成間公司呀？有啲system我仲要senior同事approve先login到呀！」
Headhunt：「你有所不知，Manager話你嚟之前，成個部門嘅男同事都死氣沉沉，因為請咗你呢個靚女，個個好似大師兄歸位咁返晒嚟呀！」
我：「吓？」
Headhunt：「唔怕老實同你講，喺你入去做之前，呢間公司其實係請過一個女仔，但係冇辦法，唔靚就係唔靚，對士氣完全冇幫助，而家請咗你，個Manager話啲男同事個個變晒樂天助人，又變到好風趣幽默，公司氣氛從未試過咁好，個Manager直頭以為啲男同事人格分裂。」
反正投稿都冇人知我係邊個同埋咩樣，我都唔否認喇，作為一個女仔，聽到有人咁樣講點會唔開心吖！直頭飄飄然啦！唔敢講係因為headhunt呢番說話而留低，不過佢講咗呢個故事畀我知，多多少少係令我考慮多咗，暫緩resign嘅決定，做咗26年人，我從未聽過有人咁樣讚我。
上個月我過咗試用期，而且同公司班同事愈嚟愈熟，有次傾開閒計我問Manager：「喺我之前係咪請咗個女仔㗎？點解唔做嘅？」
Manager：「冇呀！你呢個position之前係男仔嚟㗎喎！」
我：「個headhunt同我講，你哋之前請咗個唔靚嘅女仔，所以成間公司死氣沉沉，然後我嚟咗……班同事生猛返晒！」真係好難開口，無奈我好想知詳細。
Manager：「痴線！班同事而家靜過之前喎！嗰陣時成班男人可以講粗口講賤嘢，情緒成日好高漲，反而係你嚟咗之後靜晒，有時我都唔慣，我仲以為啲同事唔開心。」
我：「我聽到嘅版本唔係咁……」
Manager：「反而係我唔明，之前見咗好多個candidate，個個一聽到OT就耍手擰頭，係得你一個話好想入嚟呢間公司學嘢，仲話interview之後覺得我好親切，我從未試過畀人用親初嚟形容，我老婆仔女都唔覺得我親切啦！」
我：「Sorry，我冇講過……」
嗰一刻空氣突然靜止咗，好似有隻烏鴉飛過，再劃出一條虛線。
結果我又打返畀個headhunt，問佢做咩要老作，佢輕描淡寫咁同我講：「可能記錯另一間公司，我老喇，邊似你哋啲後生女咁好記性吖，同一時間幫好多公司請人，又見好多求職者，有時真係會搞錯！」
其實我唔信佢搞錯，因為Manager同返我講，獵頭會喺我過埋試用期之後先收到100%佣金，當日個headhunt咁樣講應該係想「救單」，不過算啦！食得鹹魚抵得渴，而家我都做得幾開心，加上OT係有錢，咪當賺多啲囉！
或者冇呢位咁識講嘢嘅headhunt，我早就已經放棄，變咗載浮載沉繼續搵工，所以咁樣嘅結局都唔錯吖！