我見過最混亂嘅公司男女關係……不過都係關一個人事㗎啫，就係我老細。
老細姓何，公司有個好似關菊英嘅女人平日會為佢打點一切，話就話係Admin，但其實同私人秘書冇乜分別，我仲聽過呢位關菊英咁樣喝老細：「你著多件衫啦！當自己十八廿二咩？一陣凍親呀！明知自己氣管唔好，講極都唔聽！」
就當你係開國功臣喇好未？相信都唔會咁樣同老細講嘢啦！再加上我聽過公司個司機叫關菊英做何太，咁你仲唔係老闆娘－－－呀！又真係唔係喎！正確嚟講係曾經係，而家唔係……
「唔好人嗌你又嗌呀！得幾個老臣子改唔到口㗎咋，佢兩個離咗婚㗎喇，叫返佢Amy啦！」直屬上司有一次咁樣提醒我。
原來關菊英…即係Amy嘅身份係老細前妻，ok唔緊要，兩公婆可能公還公，私還私啫！離婚都可以做同事嘅，但問題係老細嘅現任老婆，又即係新何太，目前都喺呢間公司裡面㗎！新何太嘅職位係Assistant Sales Manager！
我：「咁點解新何太唔係Manager？要再Under一個人走去做AM呀？」
上司同我解釋：「AM都畀多佢啦！新何太本身係receptionist咋！佢雖然係Sales Team，但就係成個營業部唯一唔使跑數嘅人，淨係做啲類似售後服務，以前Sales Team都冇AM呢個位，特登開出嚟巧立名目，等新何太唔使做receptionist拋頭露面啫！」
據講前妻關菊英喺呢間公司有少少股份，所以留喺度最大原因係睇住自己有份嘅生意，至於新何太上咗岸唔使做receptionist都唔走，就係要睇實老細，不過唔係防範前妻關菊英，新何太最忌個會計阿姐，又係前妻？
上司：「當年老細同Amy離婚，就係因為幾次出差都帶埋會計阿姐，好似話Amy check到佢哋返大陸係book一間房，懷疑佢哋有路，呢個先係離婚導火線，只係老細後來再婚竟然唔係娶會計阿姐，而係娶咗當時入嚟唔夠半年嘅receptionist，我都跌眼鏡呀！所以你會發覺新舊何太平時喺公司冇嘢㗎，佢兩個淨係同會計阿姐面阻阻。」
我：「咁點解會計阿姐處境咁尷尬都繼續做呀？二奶呀？」
上司：「會計阿姐話問心無愧，唔會走喎！」
我：「你覺得佢係咪清白？」
上司：「你有冇見過會計要陪老細出差？我就未見過喇！同埋你醒定啲呀，唔好對住Holly亂講嘢，我見你同佢都玩得幾埋。」
Holly係隔籬部門嘅女同事，廿幾歲咋喎！老細六張幾嘢，爺孫戀呀？
我：「Holly咁後生咁靚女都畀老細溝到？」
上司：「佢係老細個女嚟㗎！」
Holly唔係關菊英個女，都唔係新何太個女，佢係老細同關菊英結婚之前，同再上一任前妻所生，老細結過3次婚㗎喇！
有冇再複雜啲呀？前妻、現任老婆、疑似二奶，前前妻個女，全部喺晒呢間公司，雖然老細嘅私生活唔關我事，但睇嚟平時都唔好亂咁講嘢，話唔定直屬上司同倉務部個阿強都係老細個仔