前文提要，拎住留學簽證住喺東京嘅Leon，喺一次香港人聚會當中認識張生，其實一年內都係成班人食過3次飯，但最後一次因為傾開「衰嘢」，張生原來想體驗日本風俗店好耐，可惜完全唔識日文，故出價10萬日圓月薪聘Leon成為私人助理，職責係幫佢預約同埋「陪滾」。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
Leon聽到張生offer嗰陣一度拒絕，覺得呢份根本唔係工，都唔知做乜！跟住諗諗下10萬日圓雖然唔算多，但一星期只係陪張生去風俗店兩次，呢位老闆仲揚言請埋佢，舒服過之前喺日高屋做兼職，又唔使去便利店做part time，所以最後決定試下。
呢份私人助理嘅兼職從吉原起步，Leon表示係一個夢幻嘅開始，因為吉原聞名嘅泡泡浴原則上分3個層次，簡單嚟講就係最平2至3萬日圓有交易嘅低價，通常係上咗年紀嘅女人，跟住就係中等價位，然後係7至8萬日圓左右嘅高級泡泡浴，而張生就係要去高級嗰隻，請埋Leon。
張生睇中咗一個喺吉原做緊高級泡泡浴嘅女優，喺Leon協助之下終於約到喇！Leon就冇「揀飲擇食」，佢係去到舖頭先即場揀另一位日本妹，而其實係唔係女優都好，嗰間舖定價都係一樣，外國人仲要額外加多一萬日圓，兩個人埋單呢樣嗰樣用咗接近20萬日圓，張生完全唔肉赤。
Leon：「雖然頭先好開心，係好好嘅體驗，不過真係好貴。」
張生：「貴？我嗰個AV女優嚟㗎！而家仲有拍緊，點會貴呀？」
張生雖然唔識日文，但佢會用破爛嘅google translate，儘管翻譯到不知所謂，起碼上網搵資料時大約睇得明，原來佢嚟吉原之前已經試過搵一次AV女優，係一個二線頭一線尾嘅女仔，而家仲好活躍，不過價錢係……35萬日圓／一小時。
Leon：「誇張過泡泡浴喎！」
張生：「我初時唔覺誇張，因為真係J開嗰個女優，佢突然出現喺你面前，嗰種感覺好似發夢，但後來先知道如果你識日文，識去日本人嘅風俗店，同一個女優原來唔需要10萬日圓，所以我就覺得好唔抵。」
張生之前透過一啲識講中文嘅中介去搵AV女優，後來用google translate爬文，先知呢啲中介係同日本風俗店有聯繫，同一個女仔，同一堆服務，中間可以收貴你幾萬至幾十萬日圓，而其實個女優係歡迎外國人㗎，只係店家唔識用日文以外嘅語言同你溝通，呢度係一個咩都要預約嘅國家。
張生：「你覺得我用10萬請你，又冇實質工作畀你做，淨係要你幫手約風俗店同埋陪我去，認為呢份糧太多係咪？」
Leon：「少少啦，始終係去玩，完全冇工作feel。」
張生：「我想同你講，淨係搵你幫手打去約，每次都慳返幾廿萬日圓唔使畀嗰啲講中文嘅中介，我呢度倒賺好多啦，你呢10萬人工邊係錢嚟㗎！」
張生咁樣講完，Leon心態總算平衡返啲，同時間Leon都開始明白點解張生可以做到老闆，嗰種豪爽嘅氣量，識得計數去獲取最大利益，仲有超高嘅組織能力，一度令Leon大開眼界。
等等先，關組織能力咩事？
原來張生整咗個資料庫，裡面係而家投身咗風俗行業嘅AV女優列表，仲要全部都有晒link，你一click條link就會去到個女優而家間風俗店嘅網頁，成件事並唔簡單，因為有一半以上嘅AV女優去咗做泡泡浴或者其他風俗店，個人簡介會用咗另一個名，舉例，個AV女優叫桃木，「出嚟做」嘅時候會掛名叫らら，所以張生咁都起到資料出嚟真係好犀利。
呢個資料庫，總共有2767個AV女優，涉及嘅風俗店有941間，有冇咁勁呀？
Leon：「邊可能有2767個女優做緊風俗呀？」
張生：「二千幾個當然唔係全部現役啦，你唔覺有啲女優引退後冇晒消息咩？其實佢哋做緊風俗你唔知咋！不過二千幾呢個數字冇意思，每個月都有人做做下唔做，亦有新人加入，數字好浮動，而且呢個表唔係全部喺東京，有啲好遠，例如愛媛、北海道、愛知、福岡，我東京壇生意唔容許行開咁耐，淨係東京嗰啲關我事咋！」
後來睇睇下先明點解有二千幾個咁多，因為當中唔止現役同退役女優，連嗰啲淨係拍過一套片完全唔紅嘅，仲有啲五十路但叫做拍過下AV嘅女人，喺呢個「張生風俗資料庫」裡面都榜上有名，唔怪得啦，如果連呢啲都計，咁二千幾算少喇！
Leon：「終於明你點解有Yumi呢個日文咁勁嘅助理都唔用，係要另外請我。」
張生：「點畀得佢知呀，一來佢係女仔，唔好同佢講呢啲啦，我哋兩個男人暢所欲言幾開心，同埋Yumi都識我老婆㗎！」
冇錯，張生喺香港已經有老婆，但佢老婆本身有份工，因為放唔低暫時未過嚟東京長住。
Leon：「咁你老婆打算一直用旅遊身份過嚟探你呀？據我所知日本入境都有啲限制㗎喎，唔知係90日定幾多日，如果以旅遊身份頻繁進出日本，超過某個數有機會唔畀佢入境。」
張生：「所以遲早都要幫老婆申請個家族滯在簽證㗎喇，拖得就拖啦！而家更加要玩得就玩，珍惜自由嘅時光。」
張生真係說到做到，每星期滾兩次係風雨不改，好多人話日本可以有風俗，但法例唔可以「本番」（真正做），其實係表面講法㗎咋，店家做生意一定係咁講，當中其實有灰色地帶，你要「本番」，佢哋會當客人同女仔之間你情我願，所以有講法係東京只有吉原可以「本番」並唔準確，都係嗰句，睇你識唔識講，識唔識玩，最緊要都係－－－有冇錢？
Leon做咗張生嘅私人助理兩個月，已經去過3次吉原、3次池袋、2次澀谷、2次新宿、1次五反田、1次上野、1次橫濱、1次品川、1次六本木，仲有1次新大久保，有錢邊度都有得玩，但原來AV女優係遍佈咁多地方。
張生堅持宗旨，非AV女優不去，話之對方只係拍過一套就冇再做，但最緊要拍過，可以有「reference」睇，佢仲有鋪奇怪嘅癮，就係完事後要同嗰位服務佢嘅AV女優合照，基本上你肯加錢就得，加幾多就睇你點deal，而且張生並唔係要影床照，而係著好衫就咁正常合照，佢話要紀錄低自己同AV女優嘅戰績喎！
有做風俗嘅AV女優一定唔紅？都唔係㗎，一線二線三線四線都有，名就費事開啦，但係好似三上呢種級數咪唔會做囉，因為佢有自己事業之餘，廣告都接到手軟，美容用品廣告又有，網上賭場廣告又有，吸到金又使乜做呢？另外仲有AV女優轉行做YouTuber，又係搵到食，呢啲就冇做風俗喇！
只係張生唔識日文又嗌到人合照？咪就係google translate囉！日本好多店家唔係排除外國人，特別係疫情之後，大家都急住搵返啲錢，所以準確啲講，日本店家只係排除唔識日文嘅外國人，唔係唔想賺你啲錢呀，純粹溝通唔到咋！
Leon打去預約，同店家講明係外國人，功能上就係開山劈石，AV女優入房嘅時候已經知張生係外國人，但係google translate同時令張生闖禍，不過就轉駕落Leon身上……
Leon：「喂張生，你問個女優拎Line呀？店家講明唔可以私下同啲女仔交換聯絡㗎喎！」
張生：「有咩問題呀？咁我問下，個女優又肯畀。」
Leon：「最弊個女優唔知點解講埋畀店家知呢？我打去登記預約㗎，佢哋有晒我電話同資料，頭先有個日本人打嚟凶我呀，話要賠錢！」
Leon表示，因為日本人始終比較禮貌，突然聽到有日本人用咁惡嘅語氣打嚟鬧你，嗰種衝擊係好大。
張生：「賠錢？佢想賠幾多呀？」
Leon：「人哋話100萬呀！」
張生：「100萬日圓定港紙？」
Leon：「日圓。」
張生：「妖，畀佢啦！幾萬蚊港紙！」
因為張生嘅胡作妄為，令Leon第一次萌生「辭職」念頭，佢真係承受唔到張生闖完禍之後要佢執手尾，畢竟呢啲風俗店亦唔係等閒之輩，背後點會冇黑勢力吖！Leon話佢即時諗起《新宿事件》裡面，吳彥祖畀人斬咗隻手嗰一幕。（未完待續）