以留學簽證嚟日本嘅Leon，同張生其實識咗好耐，不過一直都唔算熟，香港人在東京，耐唔耐就會三五成群有啲聚會，有時一個叫一個又會識到唔同嘅人，只係大家喺日本各有各忙，有人讀書，有人搞生意，有人係公司派遣，要夾啱時間並唔係咁易。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
Leon初次見張生係喺銀座某間高級中華料理，通常呢啲聚會都係有人話識得師父，又或者係上網見到介紹好好食，跟住就吹大雞約埋去試，佢哋嘅圈子都係在日港人，Leon識得一個女仔叫Yumi，而Yumi就係張生喺東京嘅私人助理，兩個本身冇交接，而且年紀有一大段距離嘅男人，就係喺一次Yumi吹雞嘅飯局上面認識。
喺嗰間銀座高級中華料理店裡面，Leon同張生係坐一頭一尾，大家只係打咗個招呼，正式傾計都冇，直至第二次佢哋又喺惠比壽另一間食肆飯聚，兩人終於第一次交流。
張生：「咦，你又食煙㗎？」
Leon：「係呀，呢間嘢入面連煙房都冇，搞到要出嚟食。」
張生：「如果平時同我啲同事食飯飲嘢，我一定揀喫煙目的店，不過呢啲香港人聚會就無謂啦，唔通要佢哋咁多個就我一個煙鏟咩！」
Leon：「Yumi都話你平時會喺公司個露台食煙，咁都幾好吖，自己公司唔使走落樓。」
張生：「梗係，唔係開自己公司做咩呀！你同Yumi識咗好耐？」
Leon：「都係一年多啲，嚟東京先至識佢，嗰陣時喺個group識嘅，佢有幾本N1書唔要，我msg佢要咗，跟住大家就keep住耐唔耐聯絡，我都係咁樣先識到多啲香港人之嘛！」
張生：「人在異鄉，同多啲香港人玩係好事，起碼有個照應吖嘛，我好多嘢都靠Yumi，你知唔知我嚟咗差唔多兩年，淨係識講啲好簡單嘅日文咋，你叫我打去餐廳book位都搞唔掂，不過咁，日文數目字我最叻。」
Leon：「因為做生意要計數？」
張生：「唔係啦，因為要買煙，日本便利店係用number去講你買邊隻煙，仲要間間擺位唔同，有時你想指住，個counter又未必近啲煙，唔通下下拎個煙盒出嚟咩，所以我第一樣就係學好日文數目字。」
以上兩次見面，係相隔咗半年，直至第三次，Leon就畀張生招攬到「旗下」。第三次飯局Leon最早到，跟住係張生。
Leon：「Yumi唔係同你一齊嚟嘅？」
張生：「佢要幫我執埋啲手尾，不過好快㗎喇，啱喇，你係後生仔，畀啲意見，搵咗個插畫師整咗兩幅圖，想知你呢個年紀覺得邊一幅吸引啲。」張生一路講，一路喺個袋拎部手提電腦出嚟，點知一打開，畫面係AV鹹片網，雖然定咗格，不過突然見到咁樣確實幾驚嚇。
張生慌忙合返埋部腦，Leon為緩和氣氛亦講咗句：「咦，八木，やぎなな喎！」
張生：「呢個你都識？我以為個個都係識三上悠亞同波多野結衣呢啲。」
Leon：「嗰啲太大路喇，如果你鍾意やぎなな呢type，應該都會鍾意本郷愛、桃果あかり、二葉エマ呢類啦，短頭髮嗰啲？」
張生：「我冇分㗎，係AV我都鍾意，長頭髮又好，短頭髮又好，大又好，貧乳又好，五十路都冇問題，我咩都鍾意，不過你真係好熟喎！」
Leon：「一個男仔喺東京，唔通返屋企睇卡通片咩！不過五十路又真係唔啱。」
張生：「Leon你而家係全職讀書？有冇返part time？」
Leon：「之前有返過日高屋，不過好攰，聽日約咗去見便利店。」
張生：「 日高屋呀？嘩！Ok喎！咁你日文應該唔差啦！上次聽你講問Yumi拎N1啲書呀？所以而家N1？」
Leon：「其實N1都唔代表日文一定好㗎，考到同埋平時溝通得好係兩回事，不過一般應對都冇問題嘅。」
張生：「咁梗係啦，日高屋啲客咁高級，你日日都可以練日文，同日本人溝通實難唔到你。」
Leon：「日高屋好高級？你係咪誤會咗……高島屋？」
張生：「係喎係喎，日高屋係食飯嗰間呀呵，搞錯晒！」
當時Leon已經知道張生除咗自己盤生意同埋AV之外，對其他日本嘅嘢都唔係好了解，不過唔了解唔緊要，就算唔識日文都冇問題，因為張生有錢，唔使出去搵工，聽Yumi講，有啲日本客平時搵張生仲會學一兩句廣東話，其實全世界都係同一規律，講定尾最緊要分庄閒，睇邊個需要邊個多啲。
呢個時候，張生竟然向Leon提出一個要求：「有冇興趣做我私人助理？」
Leon：「Yumi咪係你私人助理囉，你想請多個？你唔會想炒佢啩！」
張生：「唔係唔係，有啲嘢搵Yumi唔方便，大家都係男人，講嘢唔使咁多避忌吖嘛！」
Leon：「不過呢，我返唔到full time……」
張生：「明，簽證問題吖嘛，唔使煩，part time形式，其實係咁嘅，我想去泡泡浴，但唔識約。」
Leon：「其實有啲泡泡浴外國人都受㗎！」
張生：「你聽埋我講先，我淨係玩AV㗎啫，有AV女優做緊泡泡浴㗎！個profile仲話接受外國人，但係個網講係咁講，預約都係要打電話去，我識鬼講咩！我有個女優鍾意咗好耐㗎喇，而家喺吉原某一間做緊，咁我打電話去唔識講，有次就搭的士直接去啦，點知去到佢話個女優已經full booking，一定要預約，妖！我都唔識預約，咁咪即係點都玩唔到囉！」
Leon：「咁……你想點？」
張生：「我好爛玩嘅，每星期要去兩次，但淨係玩AV女優㗎啫，普通日本妹我都唔會玩，我想請你做私人助理，專幫我預約，同埋同啲店家溝通，話就話有啲女優接受外國人咋，但你唔識講日文，店家嗰關都過唔到，你有冇去過高級泡泡浴先？」
Leon：「去唔起啦！高級泡泡浴一次7萬至8萬Yen，外國人好似仲要加多一兩萬Yen，我返part time一個月份糧都去唔到兩次呀！不如咁啦，你想約邊間，我幫你打去咪得囉，又唔使請我做私人助理嘅。」
張生：「我每星期會畀一堆link你，你總之幫我打去預約，每星期陪我去兩次，單嫖獨賭邊好玩㗎！我雖然咸濕，但一個人去風俗店都好忐忑，總之你呢個私人助理係唔需要處理我其他工作，淨係幫我約同埋陪我去風俗店！」
Leon：「下！好似好奇怪喎，唔使啦，我義務幫你約，同埋太貴喇，我去唔起。」
張生：「咩去唔起啫，我叫得你去，梗係我畀錢啦，10萬Yen一個月，每次去玩我幫你出埋，點睇？」
Leon：「10萬Yen？淨係幫手約，陪你去，仲要你請？咁都有10萬Yen？每星期出嚟兩次咋喎！」
張生：「係呀！好過你返便利店啦，我知道得千幾Yen一個鐘，10萬Yen陪我去風俗店都唔制？我有好多間想試呀！」
二二如四、三二如六、四三一十二，Leon內心有好多衝擊，10萬Yen part time薪酬當然唔算多，正正經經勤力啲返日高屋（唔係高島屋）肯定唔定唔止呢個數，但係10萬Yen每星期「返兩日工」，仲要係陪去風俗店幫手講日文咋喎，連玩都有人畀埋錢，好吸引啫！
Leon：「Ok，我試下。」
張生：「掂！聽日得唔得閒？吉原有個女優返13:00－20:00，你幫我約，不過佢嗰間聽日得一個AV女優返工，你就自己揀其他日本妹啦！」
Leon：「你係老細，你請我㗎，我仲有咩要求吖！素人當然冇問題啦，邊個女優？邊間？有冇電話？」
就係咁，Leon正式接咗呢份part time，正式成為張生嘅私人助理，正確嚟講係私人風俗助理，不過Leon可能將成件事諗得太簡單喇，呢10萬Yen畀佢想像中難賺……（未完待續）
更多日本職場……從華強北到東京打工 遭拖糧再被老闆粗口問候｜冇得轉工 唔忍就要返中國：「3年內只有一個月準時出糧，全年3日大假」
https://youtu.be/fr3OxV-1RCs