估唔到呢啲事會發生喺自己身上，返咗份新工，有個同事同我交接工作，呢條女叫Emily，當時佢仲有三個星期左右就last day㗎喇，我就係代替佢走咗之後嘅空缺，其實頭兩三日係正常嘅，Emily都有教我做嘢，點知後來佢嘅態度180度轉變，無啦啦當咗我係仇人咁。
起初唔知咩事，噚日仲笑騎騎，今日就黑口黑面，問佢嘢真係十問九唔應，又晦氣，當時我理解為每個人都有情緒，可能Emily有啲私人嘢唔開心啫，不過連續成個星期都係咁，我就開始覺得件事唔簡單喇，唔通係我得罪咗佢而自己唔知？
結果我唔使主動搵答案，因為Emily某一個下晝向我講咗呢番說話：「唉！玩嘢咩！話咗請又唔請，明明叫我下個月頭返工，而家突然話個position要hold住先，頂佢吖！我又未簽約喎！想告佢都告唔到，呢次真係畀間新公司玩死！」
我當時已經get到少少，見佢幾日冇同我講嘢，突然又主動向我訴苦，所以係咁易回應下：「新公司？即係你本身見成咗份工，對方忽然又叫你唔好返住呀？」
Emily：「咪係囉！我仲要辭咗職，你話點喇？」
我話點？唔通我話自己即刻走，留返個位畀你？
對於Emily嘅遭遇，我係深表同情，類似嘅情況我都聽過，咁又真係幾冇陰公嘅，辭職諗住返新工，份新工之後又冇咗，仲要冇任何合約喺手，雖則話口頭承諾都應該有法律效力，但係你要搞一大輪都冇癮啦！
其實我又何嘗唔係辭咗份工而走嚟呢間公司呢？咁唔通我讓返個位畀你，跟住返去舊公司叫頂替我嘅人走，全世界一齊還原基本步？冇可能㗎嘛！如果Emily係因為咁樣而畀面色我睇，咁就更加係一個唔成熟嘅表現，仲係小朋友咩，大家成年人嚟㗎喇！
冇任何嘢可以做，聽完咪算囉！安慰說話都講咗幾句，真係唔知仲可以點，不過Emily似乎有自己嘅盤算，每日最少問我一次：「喂，咁而家點呀？我想留返低喎！」
我：「咁你同老細或者Manager講囉，睇下佢哋有咩方法。」
我都算回覆得好客氣啦！同埋咁樣真係好尷尬，我係代你個位，你而家唔想走，唔會真係expect我辭職讓返個位畀你啩！同埋你同我講做咩啫？你直接同有關人士講吖嘛！我新嚟㗎，唔通我可以幫你處理同安排？
除咗特登講啲令我好尷尬同唔知點回應嘅說話之外，Emily仲有啲行為係充滿惡意同埋攻擊性，例如有次我去完廁所，Emily係大大聲對住其他人講：「佢返嚟喇！一日去十幾次toilet！」
又有一次lunch time，有同事叫外賣所以問大家食乜，問到我嘅時候，Emily代我答：「唔使問佢啦！我哋多嘢做先要食外賣之嘛，佢冇嘢做可以出去食喎！」
仲有次差幾分鐘先到6點，Emily竟然好似老細上身咁，大大聲向住我講：「你冇嘢做走先啦！差少少打卡冇所謂㗎！」其實佢嘅聲浪係特登想畀其他人聽到，重點想同人講我冇嘢做。
自從Emily話份新工冇咗想留返低之後，佢就再冇教過我做嘢，亦都冇畀任何嘢我做，搞到我戇居居齋坐。
我唯有主動問其他同事有冇嘢可以幫手，好在可以入下data，否則啲時間仲難捱。
或者係last day迫在眉睫，Emily見冷暴力同埋單單打打呢啲招數唔work，所以佢吼我去斟水，趁住pantry冇人嘅時候同我講：「喂！你自己走啦！唔好要我出手，其實我同Manager講一句就得，不過費事好似咁霸道咁，你做咗一個月都冇，出去好易搵工啫！」
聽到係嬲，不過我冇太大反應，因為一早預咗呢個Emily會再「出招」，只係估唔到佢會咁低手，講到出口咁直白啫！
我：「不如簡單啲喇，你直接同Manager講，唔好同我講，佢叫我走咪走囉，你叫我犧牲自己成全你，你都好自私啫！」
最終係點，冇點呀！我當然冇自己提出辭職，而對我充滿惡意嘅Emily亦都做埋last day走咗，據聞佢真係有同Manager講過自己想留返低，但係Manager話資料遞晒去HR同老細嗰邊，冇得咁兒戲，至於Emily有冇要求炒我而留用佢，咁就不得而知，因為我仲係好新，唔方便問Manager咁多嘢。
其實我真係要多謝其他同事，因為喺Emily試圖孤立我嗰陣，其他同事係冇參與，例如嗰次叫外賣，Emily大大聲話唔使問我，不過同事都係照走埋嚟叫我揀食乜。
仲有，喺Emily特登唔畀嘢我做，又唔教我任何嘢嘅時候，有另外兩個同事「醒」咗啲資料嚟畀我入機，所以當時先不致於呆坐過日辰。
點都好啦！嗰個Emily已經走咗，難捱日子亦已經過去，不過我真係第一次遇到啲心地咁差嘅人。