轉工，真係要留少少空檔，工接工除咗辛苦之外，仲未必係一件好事，你可以當係抖幾日先再衝，又可以當係畀自己一個冷靜期，呢個小空檔隨時會救你一命，最近我就遇到新公司反悔withdraw咗個offer嘅經歷，諗起都抹一把汗。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
「Ivan，唔好意思呀，老細忽然話呢個新嘅position要hold住先，暫時唔需要，所以你唔使過嚟返工喇。」
新公司個HR打畀我講呢啲，唔係啩，我連枱頭啲私人嘢都執走晒喇，差一步就叫同事食farewell飯，你而家先同我講hold住先？
我：「下，點解呀？而家先通知我個position冇咗？」
HR：「Sorry呀，老細都係今朝先決定，你……係咪已經辭咗職？」
我：「梗係辭咗職啦，你嗌我early leave吖嘛！我仲要賠錢畀而家做緊呢間公司呀！」
其實我唔使賠錢，不過我都要接返場戲。
我份工辭職本身要兩個月通知，上次去完呢間新公司interview之後，佢哋話請我，仲叫我early leave，想我提早接近一個月履新，但又唔係幫我賠錢，咁咪即係叫我自己出錢早走。
見佢offer唔錯，福利亦好好，我思前想後都accept offer，只係我唔需要賠錢，因為有30日大假累積未放，即時嗌走都仲得，亦因為咁，我就同新公司講最盡可以早走半個月，想偷兩個星期空檔去轉歐洲。
由於手握30日大假，resign方面我係嘆慢板，辭職信一早打好咗放喺櫃桶，真係冇呃你，新公司個HR打嚟嗰朝，我正正想遞信，不過上司出咗去開會，我唯有等佢晏晝返嚟先遞，後來諗返覺得好好彩，差一步我就玩完，到時新工舊工全部落空就係咁先。
其實我覺得上司係feel到我想resign，畢竟執走晒私人嘢，第二日我即刻買過啲新水杯同埋買咗盆仙人掌，嗱，我唔係想走呀，想换過啲新嘢咋！總之咩事都冇發生過，險過剃頭！
我梗係嬲嗰間新公司啦！雖然真實中我係冇辭職啫，不過心理上已經預備好轉工，女朋友同屋企人都知道晒，好在我淨係同最親嘅人講咋！
意想不到嘅係，呢間五時花六時變嘅新公司竟然主動賠一個月人工畀我，個價錢係本身佢哋畀我個offer，其實我哋係未簽任何正式合約，好坦白講，佢賠係人情，唔賠都吹佢唔漲，但我始終要扮下嘢嘅……
我：「賠一個月？我成份工辭咗喎！而家變咗失業呀！」
HR：「對唔住呀，我都係傳達老細嘅意思，唔係我做決定㗎！」
我：「咁我真係辭咗職吖嘛，你哋嗰陣仲叫我早走，我賠埋錢畀而家間公司㗎！」
HR：「我再問問老細有冇其他方案，或者睇下可唔可以賠多一個月啦！」
以HR嚟講，佢都算好相與喇，當日interview見佢係後生女，相信冇乜經驗，年資耐嘅HR邊有咁好人吖，同埋我並冇屈水之心，你咁遲先打嚟同我講withdraw offer，埋怨兩句點都要啦，只係估唔到佢會提出賠錢，仲走去問可唔可以賠夠兩個月人工啫！
同日個HR已經覆返我，最終答案係：「唔好意思呀，同老細傾過，最盡真係賠得一個月糧畀你，冇得再多，sorry呀！我盡咗力幫你爭取喇。」
得些好意須回手，我都唔希望為難呢位HR，但你哋呢一個月人工，我撫心自問受得起，所以最後雖然轉工不成，都叫做無端端有筆額外收入，唔係貪心嘅問題，只係呢間新公司要負好大責任，好彩我有大假未真正resign啫，換轉其他人真係辭咗份工，兩頭唔到岸咪畀你斷衣食囉！
好多人都話，應該等到新公司同你簽約先至同舊公司辭職，講係咁講，其實好少會遇到，或者職位高啲係常見，但一般junior或者middle level的確唔一定會簽定，某程度上係講個信字。
雖然口頭承諾都係承諾，問題係你點告佢？告佢搞幾耐？所以如果啲公司突然withdraw offer，最好係有咁早得咁早通知candidate，畀你咁樣搞一搞好傍偟㗎！(完）