Last day當日，未夠6點我已經自行quit咗公司個WhatsApp group，但係一個月後有個old seafood直接打電話畀我。
「阿偉，早幾日我傳訊息畀你冇反應，今朝問其他同事，原來你退咗谷呀！」
呢條old seafood係冇私人add我WhatsApp，之前有咩公事會直接喺office或者公司個WhatsApp group講。
我：「係呀，走咗咪quit囉，睇到你哋傾公事嘅內容就唔好啦！」
「你啲90後真係……有冇聽過獅子山精神呀？唔止講拼搏，仲講緊守望相助嘅做人道理，當年我睇住你入嚟㗎，茫茫人海做到同事都係一種緣份，有時唔係淨係講工作㗎嘛！」
我：「咁講咩呢？」
「你知唔知人際關係好重要㗎！正所謂在家靠父母，出外靠朋友，不過你記住呀，第日有機會一定要up龜自己，咁我都識好多人嘅，隨時可以介紹另一份工畀你。」
我：「唔使喇，我有新工㗎喇！」
「你唔想同我哋聚舊㗎咩？有時食飯都可以叫埋你吖！」
我：「所以你係搵我食飯？」
「唔係，我想問下你永泰（一個客嘅公司名）個價傾成點㗎？你之前聯絡開嗰個黃生咁啱又冇做，知唔知我應該搵邊個？」
你老味！咁多開場白又獅子山又介紹工又食飯，重點都係問公事，我走咗成個月㗎喇！Block柒埋你電話先！