放工飲嘢係咪計OT

幾個月前，公司嚟咗新同事，女仔嚟，老細吹雞去Happy Hour飲嘢（例行公事，每兩三個星期梗會去一次），呢位新同事咁樣問老細：「放工飲嘢？係咪計OT㗎？」

個女仔唔似搞gag，係真心問，雖然空氣突然靜止，不過大家都等緊老細親自回答。

老細：「OT？放工飲嘢計咩OT？」

「咁我唔去喇！」

有料！唔去唔緊要，佢竟然夠膽問飲嘢計唔計OT，唔計就唔去！

又有一次，老細搭正6點走嚟話要開會，個女仔一路熄電腦一路問：「而家開會？你意思係一陣開視像？我可能搭緊車唔方便開咪喎！」

老細好愕然咁企咗喺度，而個女仔已經執埋袋企起身，老細無奈地同佢講：「得喇，你走先啦！」

我以為個女仔會過唔到試用期，但啱啱今日過咗，應該係除咗唔OT之外，平時工作都做到足，所以Department Head先畀佢過。

老細冇因為咁而轉變，依然每兩三個星期就捉同事去Happy Hour，一樣係間唔中6點走嚟話開會，但無論係Gathering定係公事，總之過咗放工時間就唔會搵呢個女仔參與。

習慣真係養出嚟，例如有啲人慣咗6點即走，所以準時打卡係無人覺得奇怪，但有啲同事慣咗OT，偶爾6點半收工都會畀人問點解咁早走？呢個女同事已經幫自己「爭取」咗最好嘅福利。