啱啱見咗份工好正，上到去有另一個女仔又係嚟interview，大家填完form之後，HR就叫我哋入會議室做test，當時淨返我哋兩個，條女係咁話份test好難，不斷問我應該點答……小姐，話晒大家係競爭對手，唔通我畀埋答案你咩！
我好婉轉咁答佢：「我都唔係好識呀，無謂連累你啦！」
後來HR入嚟叫個女仔去見Manager，留低我一個人坐喺會議室，足足等咗兩個鐘呀陰公！唔通個Manager好鍾意條女，所以in咁耐都未輪到我？
呢個時候HR再度出現，佢返入會議室同我講：「恭喜你呀Samsom，暫時過咗兩關，頭先個女仔係我哋同事，試下你做test會唔會幫佢出貓㗎啫，都幾誠實，另外等咗兩個鐘，耐性方面唔錯，而家想約你下星期四second in！」
你老味見份工啫，唔使搵人做戲考驗我呀？求職者嘅時間都好寶貴㗎，仲要我呆等兩粒鐘考耐性！
而家考慮緊下星期去唔去second in，因為畀呢間公司搞到精神緊張，當日in完落樓下見到個阿婆用助行架過馬路，真係有諗過係咪「新考驗」？唔通派人測試我有冇愛心？咁搞法Second in肯定好唔自在。
講真，份份工都需要誠實同耐性㗎啦！係咪要用呢啲咁誇張同埋咁無聊嘅方法考驗求職者呢？