有個同事叫Ella，佢收到加薪$300嘅通知，因為不滿加幅太少決定辭職，Ella個Manager有挽留，仲問佢想加幾多，但最後都傾唔掂數。
我以為Ella要求大幅加薪，問清楚佢原來只係開$1000，以工作量嚟計，個人認為加$1000都算少，唔明佢Manager諗緊乜？Anyway，Ella走咗之後我要幫佢部門請返個replacement，見咗廿幾個人，經歷大半個月，Ella個Manager卒之遇到個勉強叫做適合，但人哋開嘅expected salary仲高過之前Ella份糧，唔係多少少，係多$3000！結果照請……
其實Ella之前想加$1000你唔制，而家請個貴Ella $3000嘅人你又制？咩玩法？
代Ella嗰個人做落唔係好掂，最終個Manager要我幫手再請多個人，換言之total要兩個人負責之前Ella一個人做嘅工作，咁究竟係呢兩個人太廢，定係Ella之前太勁呢？我都唔識比較喇！
重點係第二個請返嚟嘅人，份糧都係多過Ella之前嘅人工，咁即係用咗雙倍有多嘅支出，養兩個人去取代Ella，究竟佢識唔識計數㗎？
有一日個Manager走嚟搵我傾，叫我嘗試打畀Ella，睇下Ella搵到新工未？如果未就邀請佢返嚟。
我：「大佬，兩個幾三個月喇喎，正常都搵到工啦！」
「你打咗先啦！而家好好景咩？咩叫正常都搵到工？你問佢舊價加$700會唔會考慮返嚟？唔得就$800，再唔得先應承加$1000，佢嗰陣都係想加呢個數之嘛！」
我：「你兩個新人份糧都多過Ella，有心搵人返嚟就加多啲啦！」
「唔係咁計㗎！Ella係要base on佢之前份糧去加，你冇得咁樣同其他新人比，打咗畀佢先啦！佢ok嘅，你駁條線畀我，記得喎，唔好同佢講請咗兩個人返嚟，你問咗佢搵到工未先！」
職責所在，打咪打囉！結果Ella冇正面答我搵到工未，因為我講完Manager願意加佢$700之後，Ella就交帶我一句：「你幫我DKLM吖！」
好難做喎，平時我就唔講粗口嘅，但既然今次只係轉述，咁我唯有打內線同嗰位Manager交代返聲：「Ella話DLLM喎！」
更新少少，嗰兩個代Ella嘅新人，其中一個啱啱resign，下星期又要出廣告請人喇！