新年有好多祝福說話，但我最鍾意朋友送畀我呢4個字－－－心理強大
今日晏晝個post，有人留言話投稿似01嘅大陸新聞，首先我唔睇大陸新聞，另外都冇睇01，但我選擇相信個讀者冇抄襲，因為投稿內容好細緻，而且仲有其他讀者留言話有相同經歷，咁係咪大陸可以有良心公司，香港就唔可以有？
我block咗留言話抄襲嗰個人，有冇「解決提出問題嘅人」feel
？認真，關鍵唔係佢提出疑問，而係佢貼咗01嘅link，其實我哋年中block好多「舊錢幣買賣」、「投資股票講座」、「立即申請頻道睇英超」、「Hello 我覺得你很有趣，想加你面書做朋友」……呢啲留言，總之有條link引流去其他唔關我哋事嘅平台，下場都係會block，就係咁簡單。
不經不覺，辦公室日報就快7周年，有咩「盲毛乞柒」未見過？留言鬧我賣廣告，點解唔靠光合作用生存嘅人見過；留言話我啲故事好平淡好普通嘅人見過；留言話我啲故事好誇張嘅人都見過；世界上有千百萬人，你滿足得幾多個？
直接啲講，只要佢唔鍾意你，咩都可以鬧一餐，咩都可以睇你唔順眼，介意得幾多？我唔會因為有不同意見而block人，我只會因為唔禮貌嘅留言，又或者post其他平台嘅link而block人。
冇幾耐之前仲有篇讀者投稿，係講有員工因為公司廁所水壓太細，沖唔到廁而遞信辭職，有個留言話「太假，零分重作」，其實呢段投稿係來自一個我識得嘅人，如果幾年前我一定留言鬧返佢，甚至嗌佢出嚟對質，不過而家唔會喇，難聽啲講句，屌你都廢事！
頭先block完貼link嗰個人，inbox即刻收到佢send msg嚟投訴，有時覺得做人好難，提供完免費文章，仲要承受呢啲嘢，手上有稿要打，有廣告客戶工作要改，聽日仲要考試，預計凌晨先有時間溫書，如果再花精神去介意呢樣嗰樣，一日有48個鐘都搞唔掂。
我相信你哋都係一樣，每日應付正常工作同生活已經手忙腳亂，間唔中仲有啲「盲毛乞柒」殺出嚟，係要影響下你嘅心情，嘥下你嘅時間，所以我哋要學識呢4個字－－－心理強大，唔好畀啲沙沙石石阻礙人生嘅步伐同節奏。