「Anson頭先拎㽮文件畀我，掂到我隻手囉！擺明係有心，之前已經覺得佢成日望住我。」認為自己被「輕薄」呢位女同事叫Elise，佢唔係對住我講，而係對住其他女同事呻，而呢種情況係每隔三四日就會發生一次。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。（其他人士或專頁如在Facebook按「share」原文，則不在此限。）
如果就咁聽單一事件，你可能以為我助紂為虐，但實情係Elise已經周圍同人投訴過，公司其他男同事都對佢有非份之想，包括老細同埋樓下個保安，而佢副尊容係冇可能會「咁受歡迎」。
Ok！我知咁講一定會有人鬧爆，一定要靚女先會畀人抽水呀？一定要靚女先有人追咩？我絕非睇唔起Elise，而係佢太多幻想喇，就以上星期為例，公司有個男同事買咗紮花畀女友，先搵人送嚟office，諗住放工拎埋去食飯，點知Elise就咁樣讀解……
Elise：「原來上次紮花冇署名係你送㗎？你唔好咁啦Simon，我唔鍾意啲有女朋友嘅男仔，我唔會做人第三者。」
莫講話Simon聽到R晒jer，就連我哋喺旁邊嘅同事都要諗咗陣先load到Elise想表達啲乜。
Simon：「咩紮花冇署名？你講乜呀？」
Elise：「情人節嗰排呀！2月嗰陣時！有人送紮花上office畀我，卡又冇乜都冇，不過都係呢隻紅玫瑰，都係呢啲黑色紙包住，同你呢紮一樣，仲唔係你！」
Simon：「呀小姐，我喺Agnes b買，佢哋係咁樣包，我唔知你收到咩花，不過肯定唔係我送，呢紮花我都係送畀自己條女，今晚佢生日，你唔好搞錯。」
正常人都會收皮啦係咪？你點估到Elise會咁樣答：「超！篤爆咗你梗係唔認啦！總之我就唔會揀啲有老婆有女友嘅，年中最多呢啲人，最憎！你第日單身先好送畀我呀！」
講完之後Elise就走咗去，其實唔止Simon，其他男同事都有類似經歷，但係大家都係本住「好男不與女鬥」嘅心態，始終講出嚟嗰個人唔覺得尷尬，尷尬就係你自己。
喺度做咗咁多年，樓下啲保安都轉咗幾次人，只要係男人，隔一排就會聽到Elise話啲保安係咁望佢，有次仲同我哋呻：「頭先個實Q跟住我入電梯，好在我起勢咁睥住佢，然後佢先撳最高嗰層咋，仲扮冇事！」
喂呀，人哋會唔會係巡樓咋！呢度雖然唔係甲級大廈，但假假地都有閉路，冇你諗得咁猖狂啩！
不過最好笑都係Elise連老細都屈，佢話之前喺pantry沖咖啡，老細撩佢講嘢，仲提佢飲齋啡好傷身喎！
Elise：「勁搞笑，特登行入pantry呃計傾，大把人飲齋啡啦，淨係提我會傷身，係咪generation gap呢？可能佢嗰個年代興咁樣識女仔，好娘囉，健康大使咩，我見佢仲想同我講嘢，咪嗱嗱臨沖完杯啡走囉，保持距離好啲！」
真係哪來的自信，可能睇到呢度你仲會覺得Simon、保安，仲有老細都對Elise有意思，但佢真係覺得全部男人都想嗒佢㗎！有個男同事Gilbert已婚，公司張枱都擺咗同老婆嘅合照，估唔到Elise一樣搵到位入。
Elise：「嘩，你老婆同我都算係同一type喎！」
Gilbert：「點樣同一type呢？」
Elise：「都係呢啲白白淨有肉地嘅type囉！如果你老婆係呢種類型，你會唔會鍾意我㗎！」
Gilbert：「……」
我目睹成件事嘅發生經過，當時只有一首歌可以形容Gilbert嘅反應同心情，就係關菊英嘅《講不出聲》。
Gilbert講不出聲，但Elise就繼續為自己嘅美貌傾力發聲：「我諗你老婆後生都應該有我咁靚，唔怪得啦，上次個email原本應該我覆個客，結果你出手幫我reply，連啲item嘅報價都足晒，你講，你係咪想溝我？咪以為幫我做少少嘢就得呀！我好難追㗎！」
呢個時候，Gilbert終於有返心跳，可以回到一句：「你上次隔咗幾日都冇覆客，我係其中一個cc，真係驚個客發火，所以先忍唔住同你place咗個價表落去，唔係想溝你。」
Elise：「超！而家多人喺度，你梗係咁講啦，你啲男人不嬲死要面，就係唔想畀你溝，所以我而家封咗你後路先！」
個場面真係好尷尬呀……我哋班同事，而Elise真係會沾沾自喜完全唔覺得有問題。
其實公司啲女同事都知道Elise咩料，私下會討論同埋笑下，畢竟男同事先係最慘，只要你有jer，你就會成為Elise幻想世界裡面嘅其中一隻色狼或者裙下之臣，無論你單身又好，有女友又好，甚至係結咗婚有老婆仔女都好，Elise一樣會覺得你鍾意佢。
講咗咁耐，我作為公司裡面其中一個有jer嘅男人又有冇中招呢？咁梗係有啦，否則都唔會投稿啦！
早兩日因為Gilbert同我講：「我返屋企同老婆講上次單嘢，再畀埋之前annual dinner大合照佢睇，等佢知道Elise係咩樣，我老婆笑到抽搐。」
我：「齋聽都夠晒funny啦，你仲畀阿嫂睇埋Elise個樣，Elise仲要話自己似阿嫂，笑到抽搐係好合理㗎！」
咁你知啦，有時講緊人，對眼會不由自主咁望下被講對象會唔會聽到㗎嘛，不幸地，當我望過去時，竟然同Elise對望咗一眼！！！
然後放工嗰陣，Elise行埋嚟我個位，粒聲唔出就咁樣遞咗張對褶嘅memo紙畀我，我問係咩嚟，佢冇出聲，笑咗一下就走咗，仆街喇，佢唔係鍾意我呀？
打開張memo紙，我見到有幾行字：
「我留意到你成日望住我，
唔好鍾意我，我對你冇興趣！」
第二日返工，Simon、Gilbert，仲有其他女同事唔知點解已經收到風，一個二個行埋嚟笑住問我做咩偷望Elise，仲話Elise覺得畀我視姦好唔舒服……
仆街吖！呢條女真係超級自戀狂，仲要當埋我係色狼！