公司請receptionist，見咗個女仔唔錯，佢得23歲，不過已經係兩個小朋友嘅媽媽，樣靚，英文好，成個look都好，如果用receptionist做標準，佢絕對值100分。
不過凡事都有意外，正當in得好地地嗰陣，呢位年輕嘅媽媽拋咗個難題出嚟：「我想9點半至9點9左右先返到公司，唔知得唔得呢？因為朝早要送一對仔女返學，我計過時間同距離，要9點返到office應該幾快都趕唔切，我唔介意人工收少啲，$10,000都ok！$10,000夠㗎喇！」
首先講下呢個position幾錢人工先，我哋公司開16k至18k，換言之最少都預咗$16,000 budget去請receptionist，呢位年輕媽媽係知嘅，job ad亦寫得好清楚，所以佢話10k都殺，變相係自減人工最少$6,000！
我斬釘截鐵同佢講：「唔抵喎！每日返遲半個鐘至9個字就減$6,000人工，不如你諗下有冇其他方法唔使咁頻撲啦！屋企人可唔可以幫你湊小朋友返學呀？我冇細路所以唔知，或者提早少少送佢哋返學校得唔得㗎？」
對住我嘅建議同提問，年輕媽媽冇詳細解釋，佢只係講：「真係唔得呀，我一定要親自送佢哋返學，我係單親媽媽。」
頭先都講過，硬件方面佢係100％ fit呢個職位，但呢個「減人工換晏返工」嘅方案我話唔到事，唯有叫老細嚟in第二輪，等佢兩個慢慢傾。
萬六蚊嘅工佢肯減六千，公司其實慳咗好多錢，我估老細應該會考慮，不過事與願違，老細好快見完再同我講唔會請。
可能我代入太多自己嘅諗法，硬係覺得咁後生已經係兩個小朋友嘅媽媽，仲要單親，生活一定唔容易，所以我suggest過老細，有冇可能佢晏啲返就晏啲收，補返鐘囉！
老細嘅回應係唔想開呢個先例，強調而家唔係請office裡面嘅文職，而係坐喺大門嘅receptionist，如果9點前返唔到嚟就冇意思，最重要係畀其他同事見到尺度不一，會做壞規矩，又話receptionist呢個位如果唔準時返工，莫講話減$6000，就算人工肯收$6000都唔得……
係咪唔可以提早太多送仔女返到學校㗎？會唔會家家有本難念的經？例如驚前夫騷擾，所以一定要親自送呢？睇嚟我諗得太多，始終每個人嘅情況都唔一樣。又調返轉講，佢咁樣自減六千都唔係一件好事，未必要去到咁極端同蝕底嘅，希望呢位年輕媽媽盡快搵到工啦！