之前去interview遇到件好離譜嘅事，雖然唔算騙案，不過都希望多啲人知道。
首先我喺求職網見到份Sales工作（唔係舖頭Sales，係office嘅行街Sales），自己做開呢行，咁就send resume去啦！好快收到電話約見工，點知第二日上到去之後，個負責人話啱啱請夠full time，問我有冇興趣以freelance形式做？
我：「你請夠仲約我上嚟？」
負責人：「因為噚日約你，但今朝先扑槌請咗另一個人，你聽埋先，我覺得你好有potential，其實冇分別㗎，你人工仲高過full time㗎！」
成件事已經不似預期，不過一場嚟到，即管聽埋你鳩噏。
負責人：「雖然freelance係冇底薪，但你每張單可以收25%，full time得10%咋！做Sales要有一種心態－－－當自己係老細，唔好怕蝕底，其實full唔full time一樣之嘛！冇分別㗎，Sales如果著眼個底薪就冇意思啦！高佣金賺得仲多，只要你當自己生意咁做，自然就有動力！」
我：「哦，當自己係老細，咁公司啲股份會唔會分畀我㗎？」
聽到我咁講，個負責人已經收起最初虛偽嘅笑容，好直接咁同我講：「聽你咁講，即係冇心做啦！」
我：「聽你咁講，都即係冇心請人啦！」
Interview就此結束，嘥我時間！我知你諗乜，freelance慳咗份底薪，慳埋強積金，連假期嗰啲福利都慳返吖嘛！下次直接喺求職網話自己公司請義工咪得囉！我算好彩，而家失業有時間嚟interview，有啲人真係特登請假去見工，上到嚟你先話full time冇晒要轉freelance，唔好咁賤啦！
覺唔覺市道愈差，愈係多呢啲牛鬼蛇神？