之前入場睇香港隊，唔係啱啱對孟加拉，係再之前對印度嗰場，因為我著咗波衫返工，有個年長嘅同事昌哥就問我係咪好鍾意足球？又問我係咪成日買波衫？
我照直答自己由細到大都鍾意睇波踢波，唔止會買波衫，仲會賣波衫，然後昌哥就話：「啱啦！我屋企有成箱波衫，你接收咗佢啦！丟又唔係，我識嘅人都唔鍾意足球。」
我：「咁你又會有成箱波衫？咩衫嚟㗎！」
昌哥：「唔知喎，我都唔識波，啲衫我大佬㗎！佢走咗之後我都唔知點處理。」
我：「你大佬去咗邊？費事啦，一陣你畀咗我，佢問你拎返咁點呀？」
昌哥：「佢問我拎返就恐怖喇，我大佬過咗身啦！」
我：「Sorry！節哀順變！」
昌哥：「過咗身幾年㗎喇，唔係最近嘅事，你今個星期邊日得閒吖，上嚟拎走佢吖，我老婆就快忍唔住丟㗎喇！」
唔知係咩波衫，本身已經唔係好想要，一陣係啲雜牌就無謂啦！何況係屬於故人……不過昌哥講到咁，都要畀面去拎嘅。
諗住上咗去先算，點知去到真係超級無敵驚喜，李華度年代嘅巴塞隆拿、90年代心口贊助商係7up嘅費倫天拿、心口仲係JVC嘅阿仙奴、印咗簡東拿嘅曼聯、印咗施丹嘅皇馬……不能盡錄，識波嘅一定知呢批衫係無價寶，件件經典，我差啲感動到喊。
當場confirm幾次係咪真係畀我？昌哥同佢老婆都話有人要求之不得，我拎住嗰箱衫即刻飛的返屋企，除咗留低幾件愛隊巴塞嘅波衫之外，其他全部放上ebay賣，結果賺咗幾萬蚊。
後來我請昌哥食飯，話佢知賣衫賺到啲錢，點都要多謝佢，昌哥仲笑笑口話：「呢啲二手衫賣到幾多錢吖！殘殘舊舊又有浸舊衫味！拎去救世軍都嫌重，你幫我清垃圾，我請你食飯就差唔多。」
我講咗自己賺幾多，昌哥面色即時變晒，重複咗幾次：「舊衫值咁多㗎咩？」
事隔一日，昌哥走嚟同我講，話佢老婆唔知啲衫咁值錢，而家好唔開心，問可唔可以畀返啲錢佢哋，強調係佢老婆詐型，唔關佢事。
聽到佢咁講，我都好唔開心，唔係唔想畀，但賺咗錢之後我都有用，點樣無啦啦嘔返幾萬蚊畀佢呢？而且上ebay放衫都要做好多功夫，要影相，要寄貨，ebay又收我佣金，結果昌哥提議收返一半，又叫我將未賣嘅波衫畀返佢……
錢我冇畀到，但有幾件巴塞就真係畀返昌哥，經此一役大家心裡面都好似有條刺咁，有時我會嬲自己太老實，有時又會覺得昌哥太現實，我咁諗係咪好自私呢？咁佢當日無條件畀我，我又confirm咗幾次係咪可以拎，點解最後搞到咁㗎！昌哥而家對我啲態度都唔同晒，好似我食佢夾棍咁，唉！日日返工對住真係好尷尬，其實係咪我有問題呀？