「有急事，借一萬比我，明日還比你，十萬火急🙏🏻🙏🏻🙏🏻」星期日收到同事阿偉嘅WhatsApp，我覺得怪怪地，「明」日？雖然講得通，但平時佢講嘢都係「聽日」，呢期又多詐騙呢，所以我就冇理到，點知唔夠一分鐘，又再收到阿偉send嚟嘅第二句WhatsApp。
「我戶口有限制，急事要比錢國內親人，距有香港戶口，SHAO YONG，戶口號碼係XXXXXXXX」冇聽過阿偉有國內親人，同埋「距」？係咪想講「佢」呀？嘩，成件事咁大陸，咁有騙案feel嘅，我驚回覆阿偉都會有事，所以直接無視，當睇唔到。
第二日返到公司，另一位同事Karen問我：「阿偉有冇問你借錢呀？佢話有急事要入錢畀親戚，問我借$8,000，佢有冇問你？」
我：「有呀！佢問我借一萬喎，不過我覺得好似嗰啲詐騙，用字古古怪怪，所以我冇理到呀！」
Karen：「你直情冇回？我話冇錢唔借咋，然後佢話$6,000都得，我都係話冇，佢又話$4,000都ok喎！」
我：「結果你借咗$4,000？」
Karen：「冇啦，我老公喺隔籬，最後冇理佢。」
然後我哋個department head聽到，佢又走嚟搭嘴：「你哋都收到呀？阿偉問我借萬二喎！我問佢咩事借咁多錢，佢話屋企人有病，即係點呀？你哋就借一萬同幾千，我就萬二，咁睇得起我，覺得我最有錢呀？」
搞下搞下，再有另外三位同事都表示收到阿偉借錢嘅msg，但個個都覺得唔對路，冇一個人肯借，理論上大家都全身而退，冇金錢損失，呢個時候阿偉咁啱返到公司，大家第一時間問佢發生咩事，係咪電話畀人hack咗？
阿偉：「係呀！原來你哋都收到msg？我都係啱啱先知咋！」
我：「咁有冇身邊人中招呀？」
阿偉：「我都唔知，而家聯絡緊啲人，因為有個friend通知我，頭先一路行一路check返電話，原來有幾十個朋友嘅WhatsApp被封存咗，好恐怖，我驚有人真係借咗，到時都唔知點還返啲錢畀人。」
（編按：騙徒hack入你WhatsApp問身邊人借錢，一般會將你朋友事先封存，如是者，落入封存嘅朋友若然reply msg，你就唔會收到任何訊息通知）
跟住有個叫Billy嘅同事又行埋嚟：「你哋幾時收到WhatsApp㗎？」我哋幾個都話係星期日收到，但原來Billy上星期五，即係早我哋兩日已經收到阿偉嘅借錢msg。
Billy：「阿偉，我星期五收到，佢哋星期日，即係你account畀人hack咗兩三日喎，你冇發覺唔妥咩？兩三日冇WhatsApp好怪㗎喎！」
阿偉：「會唔會係啲騙徒hack下我account，又放返出嚟，睇準時機又hack下，又放返出嚟，唔同時段不斷試呀？愈講愈驚，我聯絡下啲朋友先，你哋冇入錢吖嘛？冇事就好喇！」
阿偉行開咗之後，Billy同我哋講，佢部門全部同事都收到阿偉嘅借錢msg，分佈喺星期五六日，不過重點係……
Billy：「你哋知唔知啲msg唔係詐騙，呀……都算係詐騙，但唔係騙徒send，係阿偉send㗎！」
我個department答：「唔明！」
Billy：「阿偉就係嗰個騙徒！呢招佢用過㗎喇，佢想借錢，扮畀人hack，咁咪唔使面懵囉！」
唔乸係呀？呢招咁高？
原來對上一次係幾個月前，當時有個坐阿偉後面嘅同事，睇住佢用Web版WhatsApp打借錢msg，不過唔係send畀同事，應該係send畀出面啲friend，期間阿偉仲左顧右盼，後面嗰位同事雖然睇住，但全程同客講緊電話，阿偉可能因為咁而冇留意後面有人睇到。
我：「咁死蠢嘅，後面個同事講電話係用口，對眼一樣可以望嘢，同埋用Web WhatsApp打字，其實都幾揚。」
Billy：「或者阿偉嗰次嘅目標唔係公司同事，所以咪冇咁大戒心囉，你哋真係冇借吖嘛，如果借咗就真係蠢過佢。」
我哋冇借，因為阿偉喺公司都爭好多數，雖然唔係咩大錢，有啲爭一千幾百，有啲就爭幾餐飯錢，但同事普遍都知阿偉份人靠唔住，而且經常「莫財」，例如我收到msg之後決定已讀不回，其實唔關騙唔騙案事，就算阿偉真人兜口兜面問，我都係唔會借。
後來我哋先知office裡面大部分人都收到阿偉嘅借錢msg（聽講得老細收唔到），好好彩冇人借畀佢，始終大家都知佢咩料吖嘛！
撇除阿偉之前用Web WhatsApp扮被hack畀同事見到，其實佢呢招都算幾賤，假扮騙徒，被拒絕唔使瘀，借到又可以唔使還，乜都賴晒係畀人hack，騙徒呃錢聽得多，扮返騙徒走去借錢，真係得阿偉呢種人先諗到，小心狼來了呀！(完）