呢個世界好多人都係高調做好事，其實背後目的係咪咁簡單，又或者做完show有冇真係付出呢？坦白講，真係得佢哋自己先知，所以我想講下自己公司個老闆，因為佢唔係咩明星，唔係咩大人物，低調做好事都係得我哋班同事知，呢種無名英雄先至值得佩服。
2021年嗰陣，我哋有位叫Henry嘅同事忽然請咗個長假，因為大家唔同team，初時收到嘅資訊係去旅行，不過慢慢發現唔對路，因為個「旅行」去咗成個月，因為工作上有嘢要溝通，真係冇辦法唔問下Henry咩情況，當時佢department head先至講咗個因由出嚟。
Henry請假嘅原因係發現咗自己有cancer，一開頭佢的確係請10日假㗎啫，呢單嘢得佢department head同個別一兩位同事知道，連老闆都唔知，後來因為病情比預計嚴重，Henry唯有延長休假，而之後嘅發展更加係要辭咗份工，因為有一連串嘅治療，包括化療等緊佢。
大家知道呢個事實之後當然唔開心啦！Henry喺度都做咗好多年，仲早過我入嚟，而且平時份人好nice，同佢夾嘢好smooth好易話為，講到尾Henry都係得30幾歲咋，咁後生就有咁嚴重嘅病，的確好難接受，而再過多一個月，Henry更加正式提出辭職。
成班同事都好擔心Henry嘅情況，又唔想阻住佢休養，所以只係各自send message向佢表達關心同打打氣，Henry亦有一一回覆我哋，大家點到即止，留返啲時間畀Henry休息，我哋相信佢都有好多事情要處理，亦都要有空間去調整一下思緒同埋心態。
冇幾耐就見到有個新人返工pick up啲嘢，仲要坐埋Henry個位，咁大家好自然就會覺得Henry辭咗職啦，點知佢個department head就同我哋講，原來resign嘅email係發出咗，不過老闆拒絕Henry嘅辭職，即係點？嗰個新人以contract方式暫代職位？
Henry個department head本來都唔想講，但佢真心覺得老闆太好人，所以選擇同我哋分享，畢竟唔係咩壞事或者唔見得光嘅事。
原來老闆同呢位department head一齊打電話畀Henry，對話內容係叫Henry停職留薪……做咗咁多年人，停薪留職就聽得多，停職留薪真係第一次聽，老闆希望Henry可以專心養病，唔好擔心太多無所謂嘢，仲喺電話度講咗句好霸氣嘅說話：「我養到你好返為止！」
Department head話當時自己喺隔籬都聽到呆咗，因為根本冇人知道Henry幾時會好返，癌症喎，唔係傷風感冒，好多人要醫好耐，甚至好返再復發，老闆係型，但會唔會太衝動呢？
老闆私底下同個department head講，Henry都算跟咗自己好耐，其實好想金錢上做啲support，不過Henry自己有保險，所以學人講咩負責醫藥費係比較虛無飄渺，既然係咁，不如選擇繼續出糧畀Henry，等呢位員工可以無後顧之憂，咁樣似乎係更加好嘅方法。
係咪最好嘅方法，又係咪最合適嘅做法，呢啲都係見仁見智，但老闆嘅心意同埋出發點真係令到我哋每一個員工都動容，有時至親亦未必做得到，即使一個人有錢，都唔代表佢捨得咁做，何況呢度講到尾只係職場，佢揸正嚟做甚至可以叫你賠一個月代通知金，所以老闆真心唔話得。
後期我哋成班同事都有分批去探Henry，當時佢身體同狀態已經睇得出好虛弱，最明顯係瘦得好離譜，而Henry仲叫我哋喺工作上有問題可以搵佢，反正自己除咗休息同埋做化療就冇咩要忙，我哋梗係唔會啦！
老闆牙齒當金使，停職留薪係認真嘅，呢段時間亦一直出糧畀Henry，從未間斷，有時喺office傾計，老闆仲同我哋plan之後Henry好返點樣加多個位，仲喺度諗好唔好畀Henry轉型做類似consultant嘅角色，唔需要日日返工，大家協調下啲工作可以點樣夾，當日嗰句「我養到你好返為止！」真係言出必行。
直至2023年11月，Henry份糧終於出咗最後一期，唔係老闆食言，而係因為佢走咗喇，冇機會再返嚟做。
突然打呢篇投稿，係因為同事喺度搞緊帛金嘅事，老闆亦已經同Henry屋企人取得聯絡，會另外畀一筆類似恩恤金嘅錢，銀碼我哋唔清楚，但聽聞Henry屋企人嗰邊拒收，因為佢哋知道老闆喺呢段時間keep住無條件繼續出糧，認為乜都夠晒喇，不過以老闆嘅性格，我相信佢點都會搵辦法令Henry家人接受呢筆恩恤金。
命運嘅嘢有時好難講，亦好難預計，就好似Henry咁，亦好似一個打工仔遇到好老闆咁，所有嘢其實冇得控制，只可以活在當下。
我唔敢講自己會因為呢次事件而永遠唔轉工，畢竟每個人去到唔同階段都會有唔同諗法，但有幸跟過一位咁有人情味嘅老闆，總算係無撼啦！（完）