唔知大家公司興唔興做Exit Interview㗎呢？我做緊呢間係一直都有，純粹畀張form離職嘅員工填，作為HR嘅我已經見慣，當中7成人都只會hea做呢份Exit Interview，只有2至3成嘅人會認真對待，而我啱啱就遇到一位同事係寫咗篇千字文，仲要係「憤怒底」狂數公司。
因為份Exit Interview得一張紙，其中嘅問題有「覺得公司有咩需要改善？」「同同事相處如何？」仲有MC題叫你就住各方面評下分，當日循例畀個即將離職嘅同事Edwin去填，跟手我就去print定reference letter畀佢，搞完一大輪15分鐘之後返嚟，佢竟然未填完……
30分鐘後我又走埋去，唔對路喎，Edwin原來作緊文，仲要唔知喺邊度拎咗張A4紙繼續寫，我忍唔住同佢講：「唔使咁認真㗎！係咁易得㗎喇，其實留空唔填都冇所謂。」
Edwin：「梗係唔得啦！我要講晒啲問題出嚟，畀多少少時間我！」
我唯有過多陣再返嚟，Edwin已經寫咗千字文，我收返份嘢望一望，嘩！唔使咁激喎！見到佢有段係咁樣寫：「IT部簡直係垃圾，幾條廢柴呃飯食，有事淨係識得叫你restart，炒晒佢哋啦！我阿爺都識得開機熄機，根本唔使專業知識，公司就係養埋呢啲廢人！」
Edwin仲有鬧會計部claim錢慢、鬧Sales department啲人做嘢獨行獨斷冇system、鬧公司個廁所污槽……其實呢啲都唔係重點，重點係Edwin鬧埋老細，話公司好多計劃只係流於空談，完全冇實質數據支持，絕對唔會行得通，如果唔係我連續三次行埋嚟打斷Edwin，相信佢寫本書出嚟都得。
因為做Exit Interview同埋搞一連串離職手續嘅時候只係3點，換言之Edwin仲要坐多幾個鐘先走得，所以呢份「論文」先去到我阿姐手上，繼而再遞埋畀老細睇，不出所料，老細睇完之後好在意，大約5點幾嘅時候叫咗Edwin入房傾，兩個人仲發生激烈爭吵。
最估唔到嘅係佢兩個嘈完之後，Edwin竟然留低，據稱係老細留人，話會改善同埋確切執行一啲公司計劃，我覺得個感覺就係老細同Edwin講：「得啦！你咁多意見，咁叻你做嚟睇下！」所以或多或少都有鬥氣成份，咁但係Edwin你又點解要選擇留低呢？
你梗係以為咁樣發展好癲啦係咪？未算呀！隔咗半個月左右，Edwin又嗌走，仲氣沖沖咁同我講：「唔好再畀咩Exit Interview我做！多嚿魚！一日唔清晒公司啲瘀血，一日都唔會行得通，我畀咩意見都係冇意思，根本就唔會改善！」
唉！Edwin哥，你第一次離職嘅時候就應該要知呢個道理啦！唔通你以為打篇千字文同埋講幾句，間公司就會因你而翻新大改變咩！Exit Interview唔係唔畀你填意見，但真係唔需要鬧晒全世界囉！
而其實老細亦都一早同我講咗，Edwin今次再走係唔使做Exit Interview，所以佢根本想填都冇得填，呢兩條友真係好似小朋友玩泥沙咁！
我有提議過公司將Exit Interview嘅模式由填form變成主管同離職同事對談，但係我阿姐話呢個係公司傳統，唔會無啦啦廢除個Exit Interview，因為老細想收集大家意見喎！
個人認為Edwin走得唔夠撇脫，可能佢真係有太多怨氣啦！又或者佢多多少少仲留戀呢度，甚至對公司有深厚感情，所以先會愛之深，恨之切。正如一對戀人，如果我已經對另一半失望而選擇分手，其實冇需要再講太多，愈講就只會引發大家爭吵，Let it go咪仲好！
當然老細都有問題，你想接收員工意見啫，聽完可以諗下係咪有需要改善囉！唔使夾硬留返一個咁多不滿嘅員工累鬥累，姑勿論Edwin講嘅嘢係唔係以偏概全都好，作為老細應該要有豁達嘅心去面對，而唔係睇完之後嬲豬唔忿氣。
Edwin呢單嘢喺公司都通晒天㗎喇！所以我相信未來再有員工離職，佢哋都唔會喺呢份Exit Interview裡面講真話，真係唔驚畀你秋後算帳或者夾硬留低咩！
不過我阿姐都有啲衰衰地就真，公司請得我哋做HR，咁就有責任去整理下份Exit Interview先send出去畀老細或者相關主管，講到尾都係想整合數據同資料幫公司改善啫！但我阿姐又唯恐天下不亂，將Edwin寫嘅嘢「原汁原味」遞畀老細睇，咁就梗係出事啦！