靜過圖書館？未夠靜，我個office直頭靜過太空！點證明？我試過連續幾日9至6未講過一句嘢，而且直到目前為止，我都係唔知隔籬位女同事把聲係點，得罪講句，如果唔係interview聽過部門主管講嘢，我會以為呢度係聾啞人士團體，而其實聾啞人士都係會發出聲音，所以我公司絕對係更靜更誇張。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
其實上嚟見工嘅時候，我已經知道呢間公司好靜㗎喇，冇人出聲，成個office得打字聲，不過當時我以為呢度啲人好忙，加上interview行入會議室同埋走嗰陣都係好短嘅路，邊會睇得咁細緻吖！
見工全程正常，HR同Department Head都要講嘢先可以interview㗎嘛，咁當然唔覺得有咩問題啦！但係正式返工第一日就發現唔對路喇，Department Head冇介紹同事畀我認識，唔緊要，我咪自己同隔籬位打招呼囉！
我：「Hello，我叫Chloe！」
正常當然expect個同事會向我say hi，再聽佢講自己叫咩名啦，點知佢冇，只係向我點一點頭。
然後我又向住後面位同事講：「Hello，我叫Chloe！第一日返工，多多指教！」跟住後面嗰位同事都係同我點一點頭但唔講嘢。
我留意到其他部門嘅人都係冇講嘢，所以「Hello，我叫Chloe！」呢句雖然好簡短，不過我都覺得自己製造緊噪音。冇幾耐IT同事走嚟搵我，就咁擺低張紙，上面有一個幫我開嘅公司email address同密碼，IT同事粒聲冇出就走咗，我都費事再介紹自己。
入pantry斟水，一樣係靜過太空，有兩個同事喺度沖緊咖啡但零交流，我有向佢哋微笑點頭，佢哋都點一點頭，然後就各有各斟嘢飲。
你一定會問唔講嘢點教我呢個新人做嘢？問得好呀！正當我都有同一疑問嘅時候，新開嘅公司email就收到郵件，內容係Department Head畀咗啲指令我，另外有附件係講公司啲system點用，即係我自己睇，唔好問，唔好講嘢，email已經交代晒。
開頭覺得好奇怪，我哋部門連incoming call都冇咁滯，就算有，同事都會好細聲講，你完全聽唔到佢哋講乜，唔知仲以為處理緊啲咩高度機密。
第一日返工點都有welcome lunch啩，我請都冇謂㗎，但係去到12:30左右忽然收到個email，內容係：「Dear Chloe，我哋慣咗各自食飯，你一陣夠鐘可以自己出去食lunch。」我冇翻譯呀，Department Head真係打中文畀我。
自己食咪自己食囉，有啲同事帶咗飯盒，有啲同事就出去食定唔知出去買外賣，最神奇嘅係，一離開咗公司，我見到有同事講手提電話原來係正常聲浪㗎，另外隔籬部門有兩個同事行喺我前面，佢哋仲會傾計㗎，而且講嘢同正常人一樣，所以大家只係喺office裡面做默劇㗎咋！
跟住嗰幾日我都細心觀察其他人嘅動靜，真係好少人開聲講嘢，加上同事add咗我入一個公事WhatsApp group，日常工作交流全部唔係email就係message，期間Department Head有同我講過一兩句，但都係單字好簡潔，好在呢度個個都係咁咋，否則我會以為畀同事杯葛。
由於我哋呢個office係冇Sales Department，處理CS又有另一條hotline，就係因為咁，呢度氣氛先會咁冷清，全公司得一個人會正常同我講早晨，嗰個就係外判嘅清潔公司阿姐，但佢應該知道呢度風格同習慣，清潔阿姐同我講早晨都係壓低把聲，有次佢私人電話響仲特登行出去office先聽。
連清潔阿姐都知規矩，我更加要靜啦！截至目前為止已經喺呢間公司返咗3個星期多啲，我仲未聽到隔籬位同事把聲，平時我哋都係用眼神、手指，同埋點頭交流，係咪好癲？
開頭一個禮拜真係好唔習慣，唔知點解而家愈做愈enjoy，唔講嘢仲好，有時可以集中啲，又唔需要應酬別人，最大壞處就係呢種氣氛間唔中會令人昏昏欲睡，同埋我發現自己個口臭咗，除咗lunch time之外，office hour幾乎都係合埋個口喎，冇口臭就奇啦！不過早兩日我就畀Department Head發咗少少爛渣詐型。
我行埋去Department Head個位，講咗句：「Hello……」
Department Head將食指放喺人中作勢叫我靜，但我再講多句：「唔係呀，我想講……」
Department Head忍唔住開金口：「你有咩email講。」
我：「唔係呀，我就係email咗畀你，急，見你成朝冇覆，想提提你睇email呀！」
Department Head揮動手背示意我返埋位，跟手就覆我個email，我真係覺得呢間公司好怪，算啦，習慣咗，做住先囉！不過我諗冇人間公司會靜過我呢間。(完）
求職者係復仇大王 唔請佢就報東張西望｜投訴消防ICAC再報海關 見工如追債
https://youtu.be/xYvQVp5W1AU?si=pfeyQvuHFrJrt-e5