「你上一份工點解會離職？我見你做咗一個月多啲咋喎！」面對HR嘅提問，雖然早有心理準備，但我都猶疑過好唔好講真話，畢竟呢個原因曾經畀身邊嘅人鬧爆，連老豆老母都話我唔生性唔識諗，而家要對住一個初次見面嘅HR講出嚟，我的確有少少掙扎。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我：「因為公司棟大廈好多蟲，特別係小強。」
一如所料，HR露出咗疑惑嘅表情，好明顯佢覺得我呢個離職原因好牽強，咁好啦，我要將事實還原，立體啲再描述畀佢聽。
我：「啲曱甴會飛，唔係一隻兩隻，係好多隻，有啲喺窗外面飛入嚟，就算平時離開office行出去，一打開門已經有飛曱甴喺頭頂飛過，頭頂仲算好彩，我試過好多次係隻飛曱甴正面向住我飛埋嚟，eye level咁飛埋嚟！」
HR：「嘩，好核突呀！點解會咁多㗎！你哋冇同大廈管理處講？冇理由唔理㗎喎！」終於識驚喇咩！等佢最初仲表現出一副睇唔起我嘅表情，肯定以為係曱甴仔啦！好L大隻同埋識飛㗎！正常人都驚啦！
我：「公司喺工廠大廈，前面多食肆，後面就埃住個山，其實好多曱甴同埋蟲都應該係外面入嚟，管理處控制唔到，同埋佢哋有噴殺蟲水嗰啲，可能噴完之後一兩日會好咗，但之後又會再嚟，而且噴完就周地都係曱甴屍體，加上有啲蟲已經入咗嚟寄居，我哋試過喺office裡面見到蜈蚣。」
HR：「What the fuck! 蜈蚣？蜈蚣喎！好多隻腳嗰啲，咬到好大鑊㗎喎！」咁你又冷靜啲，話晒你都係HR，interview嘅時候就唔好爆粗喇！
我：「話說公司有張梳化仔，喺reception嗰度，有次個客上嚟坐坐下突然大叫，原來梳化罅有條蜈蚣爬咗出嚟，好多腳，唔算長，好幼身，不過都夠驚啦！」
HR：「如果我係個客肯定即刻走！你公司其他女同事唔驚㗎咩？」
我：「佢哋驚㗎，見到蜈蚣會驚，踏出office門口見到飛曱甴一樣會尖叫，但係同時又慣咗，叫完就算，驚完又繼續做，同埋我哋棟大廈好多四腳蛇。」
HR：「四腳蛇益蟲嚟㗎！食蚊㗎！」
我：「估到你咁講，但都唔使爬滿成幅牆呀？好肥好大隻，同埋你知唔知四腳蛇都有聲，夜晚開OT就會聽到佢哋叫，仲有，唔係益唔益蟲嘅問題，有時開門或者路過佢突然出現，正常反應真係會嚇到彈起。」
唔知以為HR戴住VR身歷其境，我見佢淨係聽已經好驚，我繼續講。
我：「唔止咁少，office裡面會不時出現好多蟲或者甲蟲，有啲好生面口，我咁大個人都未見過，奇型怪狀乜都有，又試過有同事拍死咗一隻蟲，然後office臭咗幾日，啲味點都唔散。」
HR：「係咪嗰啲臭屁蟲呀？」
我：「我真係唔知，冇研究開昆蟲品種，總之每一日返office就要面對呢啲，喺走廊又要受到飛曱甴attack，未講個廁所，廁所係要行出去，每層一個。」
HR：「廁所又有啲咩？」
我：「有次屙緊尿，抬頭先見到有隻大蜘蛛喺牆角，我真係好驚，但係又屙到一半，我從未試過咁嬲自己忍唔到尿，但係朝九晚六有時仲要OT，開大可以忍到返屋企，開細真係走唔甩，你明唔明嗰種心理壓力有幾大？」
HR：「你舊公司好似亞馬遜森林。」
我：「差在未有蛇，都可能有，或者只係我太早resign先未有機會見到，你呢度係商業區，唔會感受到㗎喇！」
最終HR完全理解同接受我嘅辭職原因，不過仲未知佢請唔請，因為呢份工都係兩日前先至in完，等緊消息。
另外都補充返，身邊唔少朋友除咗笑我驚蟲同埋驚飛曱甴之外，仲質疑我點解要將呢份返得一個月鬆啲嘅工寫落resume，你估我想㗎咩，返「亞馬遜森林」之前，我失業咗足足5個月，如果連呢份都唔打落去仲礙眼呀！我寧願你問點解上一份工做得咁短就辭職，起碼我仲可以解釋，但如果問點解半年搵唔到工，唔通我答自己廢咩！（雖然我係廢）
若然老豆老母都識得體諒就好喇，我畀佢哋鬧咗好耐，嗰陣老豆仲咁講：「有冇搞錯呀！因為咁樣辭職？我同你阿媽以前住過木屋同安置區，仲多蛇蟲鼠蟻，你男人老狗驚呢啲？第日點保護老婆仔女呀？」
喂，男仔唔可以驚蟲？唔可以驚飛曱甴？我老豆真係性別歧視，我娶個唔驚呢啲嘢嘅老婆保護返我唔得呀？（完）
相比之下，你覺得邊個辭職原因奇怪啲？
最奇怪辭職原因 墮裸聊陷阱驚累公司
https://hkofficedaily.com/?p=15941