公司招聘流程，Confirm offer之前打畀求職者嘅舊僱主做reference check，一般嚟講係搵返對家HR傾，不過對方話自己唔係做咗好耐，將條線駁咗畀個老細聽。
我冇乜所謂，本身都係諗住問幾句就算，所以簡單道明來意就開始問：「請問Eunice之前個職位係咪Assistant Manager？」
「係呀，你哋決定請佢？Eunice做嘢好得㗎！」
我：「好，咁我想問……」
未等我再發問，對方已經打斷我：「不過如果有得揀，我就唔會想再同佢一齊做嘢囉！」
我：「點解咁講呢？」
「Eunice好叻女，但個人好麻煩，好難相處，佢喺我呢度做咗5年都冇乜同事鍾意佢。」
結果呢位舊僱主用咗大約20分鐘去唱衰Eunice，每一次嘅結構組合都係「Eunice工作能力唔錯，不過……」，先係讚一句，再大大力踩幾句。
最後我都同Eunice confirm咗offer，由今年5月做到而家接近12月尾，完全冇問題喎！
首先，我自己都係打工仔，一樣好憎reference check，但公司招聘要「走流程」真係冇辦法，其次係，一個員工選擇離開公司，或多或少都係有所不滿，可能係唔滿意人工，又或者唔滿意人事同前景，做得好地地又點會想轉吖，所以冇得期望每次離職都係happy ending，咁試問reference check又點反映到事實嘅全部呢？離開嘅人同留低嘅人根本唔同立場。
而最重要嘅一點就係，Eunice見工冇講過前公司任何壞話，但佢個舊僱主就好有機心，句句先讚後踩。
請個人返嚟，做到嘢先係最緊要，至於係咪難相處，我認為人與人之間係雙向，reference check係輔助，要嚟確認佢真係做過呢間公司，仲有title、人工，同埋任職年期係屬實，其他主觀意見參考下就算喇，如果請一個人係用reference check做依歸，咁使鬼面對面interview咩！