Send resume去呢間公司嘅時候，其中一個考慮因素係job ad講明會經常出差，佢仲列埋地點包括中東、歐洲、中日韓、美加，同埋澳洲等地，因為本身性格鍾意旅行，如果可以一路做嘢一路周遊列國，寓工作於娛樂都幾爽，唔使話咩stay behind，就算每日做完嘢再慢慢出去行下都開心啦！
Interview過程順利，對方仲話：「咁就fit啦！你本身outgoing，我哋呢度平均每兩個星期出差一次，有時甚至會喺一個地方直接飛去另一度，香港office都唔使返，最緊要你enjoy，如果隨時返得工……下個月1號得唔得？好快就有一個大阪嘅trip，然後要去一去上海，再跟住係新加坡。」
一返工就有得免費去大阪，仲話張機票係星期三去，星期日先返，嘩！唔計收工可以去心齋橋飲飲食食，淨係賺個weekend放鬆下都抵啦！
不過我都要問清楚上一手點解走先，冷靜！
我：「因為你頭先提過呢個position係replacement，請問我對上嗰位同事點解唔做？」
「佢唔鍾意出trip出得太密，有時成個月先至返嚟香港office三至四次，佢話好攰喎！」
掂啦！我冇呢啲顧慮，你叫我成個月唔返香港都得㗎！全職工作，兼職旅行，諗起都興奮！
接受offer，返工，幾日後出trip，呀……搭廉航嘅喂？唔係話睇唔起廉航，但而家做公事，好似差咁啲囉！算！男人老狗唔好咁介意飛機呢啲細節喇，飛大阪好快啫！不過臨上機前我先收到酒店嘅資料，正確嚟講唔係酒店，係bnb……係唔係我對公司trip有太大期望？之前份工都有試過出trip，首先唔會搭廉航，其次就算唔幫你book五星級酒店，都唔會book bnb，因為好唔formal，我有調節下自己嘅心態，bnb都可以好大好靚㗎嘛！
根據公司畀我bnb嘅地址，哦！原來好近黑門市場，旅遊區衰極有限啦！換個角度睇，佢冇book一間郊區嘅bnb畀我已經算係咁，直至我抵達個地址之後，我同自己講咗句：「仆你個街吖！真定假呀？」
雖然冇尺，但我相信間bnb冇100尺，一打開門就係床，床隔籬就係鋅盤，床頭對住屎塔，望落地下幾乎見唔到階磚，因為太細冇空位，入去之後僅僅夠轉身，雖然床下底可以打平收埋行李，不過我係冇位打開，換言之要將個行李擺上床先可以攤開拎嘢，即使冇電影裡面「麗晶大酒店」咁dirty，但就一定細好多，起碼周星馳仲可以企喺度同隻陀地講嘢，而呢間bnb係冇位企。
打返香港公司問咩事，負責幫我搞機票住宿個admin話係咁樣安排，呢個係公司慣例喎！
我喺呢間位於大阪黑門市場附近嘅bnb住咗一晚，好L方便呀！唔使落床就可以坐喺度對住鋅盤擦牙，好在個廁所衰極都有門咋，唔係就要望住個屎塔瞓覺，不過都好難入睡，呢間bnb嘅牆超薄，成晚聽到隔籬房嘅鼻鼾聲，好佩服人哋喺呢種環境之下仲可以瞓得咁好，相信隔籬房都係差唔多格局。
第二日我忍唔住自己book咗間普通酒店，雖然都係嗰啲APA式嘅迷你房，但我住完黑門市場個bnb之後，突然覺得呢啲細酒店已經係天堂，而我轉酒店係自費，算平㗎喇，500幾蚊一晚左右，住三晚都係千幾蚊，不過抵還抵，出差要自己畀錢住酒店簡直係痴線！
唯一可以安慰自己嘅係，去到大阪嘅工作唔算好忙，做完嘢仲有好多時間周圍去，起碼實現到我一路出差一路旅行嘅諗法。
返到香港即刻向公司表達不滿，我住平價酒店都係500幾，你間bnb平幾多呀？唔爭在啦！
「梗係唔同價錢啦，你間bnb 200幾300蚊咋！」
我：「而家唔係差成千蚊喎，同我自己租細酒店都係差幾百啫！」
「呢個公司規矩嚟㗎！」
我：「咁一係下次你補貼幾百蚊畀我，我另加上去住其他酒店。」
「梗係唔得啦！咁樣公司條數會好亂㗎！」
呢樣唔得，嗰樣唔得，日本都叫做有個譜，之後嗰轉上海就真係大鑊，無論個地方幾咁繁華，公司都有辦法book間好似鬼屋嘅bnb或者賓館畀你。
上海嗰間唔算市中心，雖然面積大過大阪嗰間，但係間房勁臭，天花板好霉，廁所漏水，唔知係心理作用定係點，我覺得張床係有蝨，瞓上去真係好痕，今次我一晚都忍唔到，結果又出去搵酒店。
大陸我唔係好熟，而且唔似日本咁安心，加上嗰段時間正值旺季，我搵咗兩三間比較就腳嘅酒店都過千，不過我返唔到轉頭呀！臭！霉！漏水！蝨！呢一個trip我仲要留低接近兩星期，最後忍痛去咗間900幾蚊晚嘅酒店，住咗12晚，埋單過萬！畀錢嗰下我已經決定要再同公司反映。
完成個trip返到香港，同上次一樣咁反映，亦同上次一樣被拒絕，而下個要去嘅trip係新加坡，提早問admin拎定個住宿地址，今次住新加坡嘅小印度區，又係類似bnb嘅物體，上網搵資料……得，趁未過試用期辭職，再咁樣自費住酒店同貼錢打工冇分別，我認輸喇！
其實我有檢討過係咪自己嘅問題，或者呢個世界有人對於出trip坐廉航同埋住呢種地方冇所謂，但我真係唔得，再講句公道說話，公司畀錢我出差，又的確冇保證過坐邊間航空同埋住邊間酒店，唯有阿Q精神安慰自己，當係有人提供機票畀我去兩個地方旅行囉！長做就免喇！
【2024最新】日本手信十大🇯🇵東京駅人気手土産🏆
