公司福利有好多種，除咗花紅、睇牙、生日假、進修資助呢啲常見嘅之外，最痴線見過有人出招聘廣告，話供強積金都係福利，真係笑爆嘴，不過我公司有一項福利的確幾好，就係每人每日有$50蚊食lunch津貼，只係來得快，去得快，實施咗一年鬆啲就宣布腰斬，唉！
上個月我department先請咗個新仔，有一日佢仲同佢講：「阿姐，多謝你請我呀，未試過返一份工食lunch有贊助，我覺得慳咗好多錢，啲friend聽到之後都話好羨慕，其實好想請你哋食飯，不過大家都話公司有資助所以唔使請，搞到我有少少唔好意思。」
當時我係咁樣同個新仔講：「有咩唔好意思吖，公司福利嚟㗎嘛，老細畀錢你食lunch，梗係有大食大出公數啦！」
言猶在耳，上星期我又同返個新仔講：「你而家可以請食飯喇，老細cancel咗個資助。」歡樂嘅時光過得特別快，唔知係新仔無福消受定係腳頭唔好，佢享受咗呢項福利冇耐就有壞消息公佈。
新仔聽到之後好似跌咗落谷底咁，係慘嘅，不過又冇得詐型，首先呢項德政其實冇寫入僱傭合約裡面，請人嘅時候亦冇用呢樣嘢做賣點，新仔都係受聘咗先至知道有呢項福利，一路都冇就好地地囉，突然收返係好難接受嘅，我都難受啦！
不如講下點解會有呢項德政出現先吖，大約喺一年前，有個女同事學人節食減肥，唔知佢實際係點樣節食法啦，淨係知有一日佢喺公司暈咗，直頭call晒白車嗰隻，搽完白花油都唔係好企得穩，當時有口痕友話個女同事如果冇錢食飯開聲，唔好咁樣捱壞身體，好衰唔衰老細聽到，仲要當真。
另外，我哋公司有好多黎生，即係工作狂，好鍾意做嘢嗰啲呀！老細一早發現唔少同事就咁食個三文治當lunch，又或者lunch time一路做一路食，結果老細同大家講，以後同事只要嗰一日有返工，食lunch都可以得到公司資助$50，條件係一定要出街食，唔可以留喺office，Lunch hour嗰一個鐘點都要放break喎！嘩！迫你開工就話啫，畀錢迫你去食飯，全公司梗係歡地喜地啦！
公司大約有30幾人，每人每日贊助$50食lunch，當你一星期返5日工，呢項德政每個月嘅支出都要$30,000，係咪覺得老細好好人呢？其實仲有段故嘅，疫情嗰兩年因為生意唔好，全公司凍薪，後來雖然有加返人工，但其實加得唔多，肯定追唔到嗰兩年凍薪嘅錢先，所以部分員工都話老細呢一著只係收買人心，睇你點解讀喇！
細心計下，一人$50，一個月返20日工即係每人有$1000食飯津貼，如果凍薪兩年，呢條數應該唔止$1000，你又寧願公司現兜兜加你$1000蚊人工，定係每日津貼$50畀你食lunch？梗有啲人慣咗帶屋企煮嘅飯盒㗎嘛，而家焗住要出去食使咗呢$50，照道理總有人寧願你加落份糧度，然後食咩交返畀佢哋自己揸主意。
咁當然啦！香港地大把老細唔加人工都唔會覺得有罪疚感，所以呢間公司都算係咁喇！
講完前因，講埋後果，無啦啦點解會取消呢？因為有位叫Norman嘅男同事走去「轉售福利」，首先講下我哋點樣claim公司拎飯錢，方法好簡單，就係每日食完lunch keep返張單，去到月尾一次過交畀會計拎返錢，例如你食咗餐飯係70蚊，張單嘅上限都係贊助50蚊，所以大部分同事都會用盡佢，寧願食貴啲自己貼多少少，亦有同事係計到條數啱啱好，寧願食個40幾嘅餐蝕幾蚊畀公司，咁點解唔就咁每人每月發放1000蚊呢？咪就係因為老細一定要大家出去食take 個break囉！
早排有個食煙嘅同事落街「呼吸」，呢度幾幢大廈嘅人都會聚集喺樓下某一兩個位「打邊爐」，食煙嗰位同事表示，佢無啦啦畀一個見慣見熟，喺同一幢樓返工嘅煙友「問價」，對方問：「Norman放假幾時返呀？係咪未返就唔用得半價食lunch優惠？」
嗰位食煙嘅同事最初唔知自己聽緊啲乜，再問清楚先至知道Norman將呢項福利半價兜售畀人，總之就叫人哋每日交一張餐廳收據畀自己，茶記又得，大快活大家樂美心乜都得，總知要當日嘅單，咁Norman就會回返25蚊畀人，呢啲可唔可以稱之為回佣呢？Norman「收購」完人哋啲單，月尾就拎去畀會計攞返津貼。
東窗事發係因為Norman放5日大假，佢夾埋星期六日，趁連休7日去旅行，好衰唔衰有條煙友唔知係等唔切，定係純粹R水吹，將呢件事無意中講畀我哋個食煙同事聽。
嗰位食煙嘅同事收到風就走去話畀Admin聽，Admin又叻唔切直接踩入房同老細講。
我哋做得耐嗰班梗係知咩事啦！不過好似新仔咁樣，佢就提出一個疑問：「Norman將呢個午餐津貼用半價賣出去折現，咁佢自己都要食飯㗎？」
其實Norman本身就係住公司附近，以前佢都係帶飯，有津貼之後就直接行返屋企食，飯盒都慳返唔使洗。
單嘢擾攘咗一段日子㗎喇，Norman旅行完返嚟亦都認咗，因為冇得唔認，食煙個同事癲到叫嗰個「問價煙友」做證……
老細嘅反應唔係嬲，而係表現得好失望，覺得一番好意津貼你班友，到最後畀人用呢啲漏洞折現金錢，咁呢件事又冇升級到炒人嘅層面咁嚴重嘅，畢竟食lunch津貼唔係一個official嘅福利，推行嘅時候亦只著眼於一定要出街食嘅規則，冇白紙黑字寫明唔可以轉賣，但你都明㗎啦，精面同漏洞畀你鑽到其實冇用，個施予者覺得偏離本意一定會唔開心，所以老細亦cut咗呢項午餐津貼。
正如頭先所講，因為呢項福利完全唔喺份僱傭合約裡面，開始時亦冇講到永遠津貼，所以要cut都冇得嘈，而大部分同事嘅矛頭都係指向Norman累街坊，我覺得當日50蚊食lunch資助太倉促喇，冇認真諗埋執行上嘅細節，變相就會出現後來嘅爭議同埋問題。
可能係有啲人真係鍾意食屋企飯囉！媽媽餸隨時好食過街，亦有人係唔想食咁多味精先至帶飯，所以唔係個個為慳錢先帶飯盒嘅，
我唔知呢位Norman係咪基於以上原因啦，而且佢都需要符合一個條件先可以將公司福利咁樣轉售圖利－－－就係本身住得好近公司。
從人性嘅角度去分析，老細畀咗呢個津貼，人人有份喎！你唔用咗佢，自己餐餐帶屋企飯盒，心理上都會覺得好蝕，所以Norman最終選擇將食飯津貼用呢種方式折現，我只係諗，如果一嚿大錢或者都值得咁做，但細心計一計，Norman半價賣，每張單賺25蚊，一個月20張單都係賺得500蚊，咁少錢要走去冒呢個險好似……唔抵囉！何況成為公司同事眾矢之的，你自己返工嘅心理壓力都好大。
同埋衰啲講句吖，保密功夫可唔可以做得好啲呀，有冇同嗰條煙友買家講唔好爆響口㗎？
取消咗個福利，我覺得食煙收到風走去報寸嗰個同事，仲有直接搵老細嗰個Admin都有份做成，當時可唔可以用其他方式同Norman傾？而家一拍兩散，唔止喎，公司成30幾人，一拍30幾散，篤爆咗Norman搞到其他同事一齊受罰，係咪做多咗呢？
同埋呢……不如老細直接加人工，正正經經將津貼加落份糧度啦！福利可以cut，所以加薪先係最幫到手同埋最長遠，我明白呢個食lunch津貼本來係冇，但有有下突然收返，對員工嘅士氣都會構成打擊㗎！（完）