將呢件事同身邊朋友分享，佢哋覺得個Manager似寸緊我，不過我就向好嘅方面諗。
上星期去Interview，過程順利，最後我問個Manager：「通常要等幾耐先知結果㗎？」
Manager：「之後冇人見㗎喇，你係最後一個，其實你冇問題呀，晏啲我同人事部交代下，佢哋會打畀你傾細節，合約嘅嘢我畀返HR跟。」
即係ok咗呀？
我：「多謝你畀機會，好期待之後一齊合作。」
Manager：「多咩謝吖，你自己有實力啫！經驗話我知你做嘢一定得！」
有人請，仲對我咁有信心，簡直係一個勵志嘅故事，點知個Manager繼續講：「呢行好現實，通常靚仔靚女容易啲上位，但你可以喺之前間公司做咁耐，應該有啲能力，我鍾意實幹型，唔鍾意賣樣！」
即係……
唔識畀反應，而佢原來未講完：「頭先一入房，我見到你已經喺度諗～～唔！呢個女仔做嘢一定好得！」
夠啦好冇呀……
個Manager仲有補充：「我哋公司太多花瓶，靚女夠晒㗎喇，冧客冧編輯佢哋就叻，跟job都係甩甩漏漏，所以我對你寄予厚望㗎！」
Quit咗上一份工之後都搵咗3個月，加上臨近年尾，Send出去嘅CV音訊全無，而家終於有著落，點計都係開心事，所以我最終有take到offer，仍然相信對方出發點係褒，唔係貶。