入咗呢間公司兩個月多啲，自己部門啲同事好好呀，反而最難頂係個會計阿姐，claim親錢都當我係犯（人）咁，呃你嗰幾廿蚊咩？同埋佢搞咁多嘢問長問短，但係連第一個月嗰$145蚊車錢都未claim到畀我，本身就唔係咩大錢，不過因為佢態度勁差，結果我忍唔住開佢波！
「你呢程巴士係葵芳落荃灣，架巴士幾多號車呀？呢程小巴呢？邊條線呀？乜都冇點claim畀你呀？」
我：「冇人同我講要mark……」
「冇人同你講都要mark㗎！點知你有冇搭過呀？一日十蚊八蚊，個個亂咁填，咁你咪好發！我點計呀？」
我：「點計係你嘅事，我Sales嚟咋，做埋你嗰份好唔好？Claim嗰一百幾十隔咗兩個月都未claim到，係咪要出張巨型支票畀我呀？欠咗你咩！我而家claim車錢咋！應得㗎！唔係問你借問你乞呀！」
其實係個會計阿姐大聲先，佢好似想全部人望住我咁，想我瘀，咁得啦，我咪以其人之道還治其人之身囉！你大聲，我可以更大聲。
呢個社會真係有好多人欺善怕惡，串完佢之後，個阿姐就笠晒水，但我未過試用期，以為今次玩完啦，點知今日上司畀咗封信我……
「喂！提早過試用期，畀心機做！」
我：「提早成個月？多謝！」
「我多謝你就真，呢度個個都想屌柒個八婆，得你敢出聲，爽呀！抵畀你提早過啦！」
我load咗陣先get到上司口中嘅八婆係指個會計阿姐，發火鬧人可以提早過試用期，我都有啲意外。