「做老闆唔好下下睇錢，眼光放遠啲！」呢句嘢係我阿姐講，仲要兜口兜面對住老闆講，我聽到眼都凸埋。
當時我啱啱入職呢間公司做HR，由於經驗係最淺，所以平時請人淨係負責in啲junior position，而我跟著個阿姐就癲嘅，佢講上述說話嗰陣，大家係開緊會揀場地食annual dinner，我阿姐除咗係HR Manager之外，亦要兼顧埋Admin工作，老闆聽完啲酒店價錢之後嫌三嫌四，又話呢間貴，又話嗰間唔抵，結果阿姐就叫佢唔好下下睇錢，眼光放遠啲……
乜呢句唔係通常老闆向員工講㗎咩？奇就奇在老闆被窒完冇聲出。
呢種情況並非第一次發生，另一次唔記得講開啲咩，老闆隨口呻咗句好辛苦，我阿姐一嘢ban埋去：「做老闆唔好怕辛苦，少少嘢都唔捱得！」
唔肯定老闆心裡面有冇嬲，但佢冇駁阿姐，只係無聲無息咁行開，佢兩個嘅角色同埋對白係咪調轉咗呀？
因為嗰陣我未過試用期，唔敢問太多，阿姐嘅語氣係嘲諷中帶兇狠，其他同事又好似見慣不怪，咁我梗係唔出聲啦！
另一次老闆問阿姐關於工作嘅嘢，跟手阿姐即刻跳掣：「呢啲嘢唔好問我啦！我出埋你份糧好唔好？你自己唔識check㗎？」老闆都係冇還拖，唔通有把柄喺阿姐手上？
後來又發生一件事，嗰次老闆話某個position請極都請唔到人，唔明點解出到$30,000都冇個求職者似樣，你估下我阿姐點回應？
「30,000請唔到咪出32,000囉，32,000請唔到咪出35,000囉！請個人都請唔到，你點做老闆呀？」
乜請人唔係阿姐嘅工作咩？請極都請唔到仲可以鬧返老闆轉頭？
老闆聽完又係冇出聲，阿姐繼續唔放過佢：「間間公司都請到人，點解係你間公司唔得呀？有人嚟見工你就感恩啦，阿芝阿佐！你揀人時人揀你，你當呢度新鴻基定長江呀？自量下啦！」
唔係啩，老闆咁都唔扯火？仲粒聲唔出返入房。
當時我已經做咗一段時間喇，加上同個別一兩位同事幾傾得埋，忍唔住搵個機會問下人，究竟點解老闆咁驚我阿姐呢？
唔問猶自可，一問就好震驚，原來阿姐係老闆前妻，不過離咗婚好多年，未離婚前阿姐已經喺呢間公司以老闆娘姿態做HRM，所以佢兩個舊陣時係夫妻檔，都估到佢兩個關係唔尋常㗎喇！
同事話阿姐冇解釋因咩事離婚，不過就親口講過老闆冇遵守承諾畀贍養費，而其實我阿姐係離開過公司一排，後來又入返嚟做，話咁樣先保證到呢位前夫每個月入錢畀佢，所以份糧係本身人工再加大個銀碼，咁我又唔明喇，反正你都係要畀嚿錢出嚟，何不正正經經畀贍養費呢？
有同事估計內情可能好複雜，例如牽涉到離婚之後賣私人物業之類，總之一定仲有嘢傾唔掂數，否則老闆冇理由擺個前妻喺公司篤眼篤鼻。
姑勿論如何，我阿姐寸前夫老闆嘅說話又真係幾啱聽。