我做茶記，之前有個男人嚟見工，佢話自己叫阿明，三十幾歲，老闆因為等人用所以求其畀張白紙佢填資料，再係咁易傾幾句就請咗。
呢個阿明好面熟，唔知邊度見過，而且我發覺佢好斯文，青靚白淨，完全唔似做樓面，初初入嚟直情係雞手鴨腳。
「寫凍OT就得㗎喇，鴛鴦就咁寫央啦！你咁多筆劃落單會好慢，之前撈開咩？」
「我以前暑期工都做過侍應㗎，喺酒店啲中菜廳，雖然好短時間，又十幾年前，哈哈！」
雖然阿明係生手，不過肯做又唔怕蝕底，工作態度一流，唯獨是水吧佬成日恰佢。
水吧佬見阿明斯斯文文，講嘢又陰聲細氣，加上初期會落錯單，所以經常大聲喝佢，當然夾雜住粗口啦，真係好難聽㗎！有次客人叫0賓，阿明全寫凍檸檬利賓納，水吧佬即鬧：「DLLM，你係咪傻X嚟㗎？0賓就梗係凍㗎啦！唔通熱呀？寫咁柒多字，點X睇呀？OnXX喺度呃飯食，幾千蚊人工都畀多你，正廢柴，你呢啲咪死港燦囉！」
嘩！當阿明落錯單好未？人哋當時做咗幾日咋，使唔使咁多粗口呀？仲要食晏時間爆晒場咁樣鬧，你都係想搞到人哋瘀皮啫！
其實阿明幾醒㗎，手騰腳震嘅情況只係維持咗一個禮拜，適應能力同埋學習能力都好強，只不過水吧佬好似搵到欺凌目標咁，日日都要鬧阿明先安樂，仲成日點佢出去便利店買嘢。
阿明做咗兩個月多少少就冇做喇，後來老闆請咗個有鄉音嘅阿姐，唔係歧視，都唔關口音事，呢個阿姐做嘢真係唔掂，但佢勁粗魯勁巴辣，水吧佬反而忌個鄉音阿姐三分，呢啲係咪叫做「好佬怕爛佬，爛佬怕潑婦」？
上星期有一晚收工，我竟然撞返阿明，條友著住西裝成個look唔同晒，跟住我先知佢原來住附近，以前耐唔耐會嚟我哋間茶記食嘢，唔怪得當初硬係熟口熟面見過啦！
「咩事呀你？大熱天時著老西，去飲呀？」
「唔係，啱啱放工。」
「放工？撈咩呀？」
佢就咁同我講「銀行」，然後我問佢拎卡片，話將來借錢搵佢，其實講下笑啫，純粹八卦想知佢撈緊咩，佢都笑笑口同我講唔係做借錢，不過照畀卡片我，全英文，乜春嚟㗎！
我問阿明點解做完茶餐廳去做銀行咁跳，佢話自己不嬲做開bank，已經做咗7, 8年，不過公司之前裁員，佢唔想日日坐喺屋企，又考慮過轉行，做啲冇咁大壓力嘅工，咁啱路過見到茶餐廳請人，跟住就入去見工。
我仲問佢：「銀行唔係要請大學生㗎咩？」
阿明答得好搞笑：「咁我都大學畢業嘅，不過茶餐廳見工老闆冇問，淨係問我有冇做過樓面，諗返轉頭如果當日老闆問學歷，我應該會話自己中學畢業。」
大學生講出嚟都馨香啲啦，講咩中學畢業呀？
件事就咁完咗，而我姐夫本身就有啲學識，都係做銀行，所以我拎住阿明張卡片問姐夫，究竟呢份係咩工？
姐夫睇完卡片反問我：「呢個係你舊同事？」
我：「係呀，你識㗎？佢做咩㗎？」
姐夫：「咁又唔識，不過佢做Investment Analyst喎，去你間茶餐廳做侍應？兩年經驗都兩三萬啦！」
我：「佢話自己做咗7, 8年喎！」
姐夫：「咁4至5萬一個月走唔甩。」
我：「你估佢係咪呃人呢？」
與此同時，姐夫即刻開個網search（係一個叫linkedin嘅網站，我照打返出嚟），有阿明張相，姐夫問係咪呢個人？
我：「係呀！咪係佢囉！張相咁扮嘢嘅，同茶記個look好唔同。」
姐夫：「咁你呢個舊同事都幾能屈能伸，失業肯去茶記做，應該冇呃你啦！呢度有update佢新公司，之前嗰間都勁，中間隔咗幾個月，就係你話佢嚟做侍應嗰段時間。」
後來我WhatsApp阿明，同阿明講我姐夫話佢好勁，再問佢搞咩要嚟做茶記，仲要畀水吧佬日日粗口問候，阿明隔咗成日先覆我：「你睇我好，我睇你好啫，我都想好似你咁，放工就放工，你估我份工唔使畀人問候呀？Office啲人講嘢有時仲難聽過粗口啦！」
直至而家我都唔知阿明份工做乜，但諗返水吧佬曾經鬧佢係「廢柴」同埋「幾千蚊人工都畀多佢」，唔知點解覺得好好笑。
阿明搵到錢，但放工唔係放工，我搵唔到錢，但放工就好輕鬆，各人有各人嘅路啦！