Manager叫我入房傾計，正式通知我過咗試用期，有加人工，另外問我做得慣唔慣？
我：「慣呀！不過有樣嘢想請教你。」
Manager：「咩事？」
我：「因為部門啲人各自食晏，但落到樓下canteen都係撞返Jason同阿迪佢哋，我留意到佢兩個唔會坐埋一齊食，次次都各自各玩電話，咁我最初就唔打擾佢哋啦，自己行埋一邊搵位坐就算，不過明明係同事，唔打招呼又好似好怪，所以早兩日我特登坐去Jason隔籬，點知佢好似周身唔聚財，未夠鐘已經走咗，我想問班同事係咪唔鍾意我？」
Manager：「唔關你事，佢哋冇惡意，呢種係咪叫I人？」
我：「我都係I人，不過新嚟好驚同事覺得我冇禮貌，原來我同Holly仲有Steve朝早都係同一班車，次次我都避，跟住喺後面又見到Holly避緊Steve，個場景好搞笑，我哋三個人同一班車但從來唔打招呼，當見唔到，前中後三個人行，Holly避Steve，我避Holly同Steve！」
Manager：「其實我係第四個，我朝朝都睇住你哋三個，你樂富上車㗎嘛，啱唔啱？我都好怕撞到你哋要傾計，唔知講乜！」
我：「咁……」
Manager：「你唔使同我打招呼㗎，我朝早未回魂，鍾意自己聽歌放空。」
呢份工係我人生第一份full time，真係有諗過係咪自己性格有缺陷，畢竟出嚟社會做嘢點都要合群，而家放心晒喇，原來成個部門都係I人。