去見工嗰陣已經有個男仔喺度填form，職員畀咗張form我之後，冇幾耐個男仔就填完喇，但佢似乎有好多不滿，係咁褶褶聲，及後HR行出嚟叫佢入房interview，個男仔即埸向HR抱怨：「你哋張form好多嘢填喎，填極都仲有，唔問埋星座同血型？驗埋尿好冇？」
當時我喺度諗，佢真係嚟見工？定係佢識得HR㗎？冇理由咁寸㗎喎！
HR問返佢：「咁你仲見唔見吖？」
男仔：「唔上都上咗嚟，唔通唔見呀？」
睇嚟佢真係好在意張Application form
不過咁嘅態度仲有機會咩？果然不出所料，個男仔5分鐘後行返出嚟，頭也不回走出門口，其實我仲未填完，但HR已經叫我入去，佢話未填完都冇所謂喎……
入房坐低，HR完全冇問我嘢，淨係掛住發牢騷，不斷同我數頭先個男仔：「我做咗10年HR，從未見過求職者咁冇禮貌！」
唔知講咩好，唯有禮貌式微笑，HR又繼續：「頭先你都見到啦，問我要唔要填埋星座同血型？佢入到房同我講係O型血，問我要唔要寫埋落去？填張form都咁唔好老脾，點請你呀？」
唔想畀意見，不過HR仲呻緊：「請佢返嚟畀錢佢賺，仲要受佢氣？雖然份糧係老細畀啫，我叫得佢上嚟見工，都算係佢半個伯樂吖！咁晦氣咪鬼見啦！嬲嬲地咪嗌佢走囉！」
我唔知應該畀咩反應，而最神奇嘅一幕隨即發生，個HR話風一轉直接問我：「你做唔做？下星期返工得唔得？」
我：「吓！」
HR：「我費事見嚟見去呀，好得閒呀而家？我都好忙㗎！點？你O唔Ok？係就傾人工，Expected salary冇變吖嘛？下星期返得？」
咁我的確需要一份工，雖然過程好兒戲，好似係上一位激親佢，令我冷手執個熱煎堆，但既然HR直接話請，我又冇其他工見緊，所以當時就即刻應承咗，至於點解唔使見Line manager可以由HR決定？又或者點解冇其他競爭對手？呢啲我已經冇深究喇，合約已經簽埋，下星期返，做咗先算啦！
其實我係咪要多謝嗰個男仔呢？