從深圳華強北到東京高田馬場，兩位手提電話維修員阿根同阿池係抱住夢想嚟到日本，畢竟有中國老細賞識，諗住就算離鄉別井唔識日文都會有同胞照顧，不過佢哋好快就意識到所有嘢都係自己一廂情願，3年嚟僅得一個月係準時出糧。
最初透過中間人聯絡到阿根同阿池之後，我哋先進行咗一次冇錄影嘅對談，因為都要了解咗件事先。約喺我六本木嘅office見面，佢兩個搭電車時蕩失路：「頭先搭錯車，而家喺壽比斯，灰色㗎條線，仲有幾個站就到，好快，唔好意思。」
阿根同阿池係提早咗好多出門，所以就算搭錯車再修正，應該都唔會點遲，問題係我唔知邊度係「壽比斯」，後來諗清楚啲，灰色應該係講緊日比谷線，佢哋話仲有幾個站到，再加上由高田馬場出發嘅方向，我相信佢係講緊惠比壽。
果然不出我所料，從office行到去六木本站就見到佢哋，惠比壽過嚟得幾個站，真係冇估錯。
阿根：「嘩！呢度就係六本木呀？我哋第一次嚟。」
我：「食啲嘢先啦，你哋嚟咗日本做嘢幾耐？兩年？」
今次到阿池答：「3年喇！」
阿根同阿池喺深圳華強北嘅時候已經一齊共事，後來經朋友介紹認識而家個老細。
阿根：「我哋老細當年嚟日本開舖，賣二手電話同埋做維修，需要喺國內請維修師父，見佢人工係出得高過華強北，又話做到咁上下可以幫我哋申請永住，咁咪跟佢過嚟東京囉！」
其實阿根已經結咗婚，有一個十幾歲嘅仔，初期佢更加向老婆同個仔講，將來接埋佢哋嚟東京，話老細應承會幫手搞，後來先發現呢個係大話。
較為人熟悉嘅留日簽證包括讀書同埋經營管理，如果根據傳統嘅講法，住滿5年係可以申請入籍（需放棄原有國籍），住滿10年就可以申請永住（不需放棄原有國籍），但其實呢堆條例只供參考，日本當局批唔批你仲要考慮好多因素，包括你嘅收入同埋有冇交足稅等等，如果申請入籍，對日語更加有一定要求，或者你會喺網上見到有人post「我成功入籍」同埋「成功拎到永住」，但其實有更多例子係住咗超過10年，每次申請永住都唔批。
阿根同阿池「帳面上」都係日本最低工資，而阿根如果要接老婆仔女過嚟，角色就會變成扶養人，人工已經低，仲要養兩個，申請永住嘅難度比一般人更高。
阿根：「我哋係派遣簽證，後來先知轉工或者轉公司都唔得，老細又唔肯堂堂正正出糧。」
兩位手提電話維修員都係持派遣簽證，簡單而言，邊間公司申請你過嚟日本，你嚟到就要幫邊間公司工作，可能會有人覺得咁樣好harsh，換言之間公司對你再差，你嚟到日本都只能夠默默忍受，但其實換個角度睇，如果日本政府唔作出規管，隨便一個人喺日本開間公司，然後喺外國請人嚟，請完之後由得佢哋喺日本做其他嘢，住滿10年又話攞永住，咁呢個地方會變成點？我諗……成個東京都可能係講緊普通話。
請阿根同阿池喺Roppongi Hills食壽司，我好驚訝呢次係佢哋3年以嚟第一次入日本餐廳食日本嘢。
阿池：「平時星期一至六由朝早10點做到夜晚10點，仲可以去得邊，一係煮，一係就喺高田馬場嗰間中華料理食囉，做足6日，星期日都得返半條命，邊度都去唔到，又冇大假。」
阿根：「有，一年得3日大假，你話去得邊？」
除咗工時長同埋近乎冇假期，唔識日語都係佢兩個去其他餐廳嘅障礙，阿根同阿池直認因為怯，3年嚟只敢去中華料理，原來係可以講中文。
3年嚟一直重複嘅事唔止來來去去只會食中華料理，仲有一件事重複又重複地發生，就係被老細拖糧。
阿根：「同呢個老細做咗3年，得一個月係準時出糧，以為跟住個中國老細，嚟到日本會睇住我哋，點知反而係專恰我哋，中國人都唔係幫返中國人。」
阿池：「佢噚日又擺咗幾箱電話零件入嚟我間房，我就嚟行唔到。」
阿根同阿池嘅老細喺高田馬場租咗個單位畀佢哋，兩房一廳，廳係畀佢哋維修電話，房係畀佢哋瞓覺同埋擺貨。
老細當初叫佢哋嚟日本做嘢，答應咗工作時間係朝10晚7，由於工作同居住嘅地方係同一度，所以一張開眼基本上就要維修電話，然後夜晚6點幾又會從門市搬幾箱電話上嚟，所以就keep住OT到10點，故此實際工時係朝10晚10，當然冇OT錢啦！
我開始明白點解佢哋嘅世界只有高田馬場。
除此之外，老細仲沒收咗阿根同阿池嘅日本銀行提款卡，因為老細每月會準時出日圓去佢哋嘅郵便銀行戶口，目的只係做樣畀日本政府睇，方便稅理士出數，但老細係會自行用佢哋張提款卡拎返走啲錢，之後先出返人民幣去阿根同阿池嘅支付寶或者微信，問題係永冇準時。
阿根：「之前老細先問我借錢，佢話用嚟出糧喎，你問我借錢出返糧畀我自己？咩道理呀？冇諗過嚟日本打工係咁！」
超長工時，一年得3日大假，冇OT冇雙糧，3年嚟只係試過一次出糧準時，員工要同零件一齊瞓，仲反問員工借錢出糧，雖然派遣簽證唔可以轉工啫，你都可以選擇唔做吖！
結果喺我約阿根同阿池另一日做正式訪問時，阿根真係走咗喇，而且係半夜偷走直奔機場，所以正式嘅訪問片只會見到阿池一個人亮相，今晚《辦公室日報》YouTube會有阿池親身描述所有細節，希望大家會留意。
Office Daily 辦公室日報 YouTube：https://www.youtube.com/@OfficeDailyHK