一萬蚊開工利是

日本公司成立以嚟，我都係畀員工放晒兩邊嘅公眾假期，因為我部分工作跟香港市場，而由於喺東京office呢度請嘅都係日本員工，又或者係以工作簽證在留日本嘅外國人，既然大家生活喺呢個城市，又冇理由唔畀佢哋放日本假，結果2023年香港有17日公眾假期，日本又係17日，當中只有一日係撞正，所以上年全年就放咗33日公眾假期（未計佢哋啲大假）

最「正」係有啲假期幾乎兩地連住，例如2023年5月1係香港勞動節，日本就2023年5月3, 4, 5分別放憲法紀念日、綠色日、兒童節，嗰個星期大家只係返咗一日工，差啲連佢哋個樣都唔記得咁滯。

上星期收爐，我一早同同事話食完晏走得，變相放半日，有個做咗唔夠一年嘅日本同事問點解。

我：「咁你放定唔放？（休みが欲しくないの？）」

日本同事：「放！（欲しい）」

叫佢哋2月15號先開工，日本同事又問：「點解嘅？（なんで？）」

我：「……咁你放定唔放？（休みが欲しくないの？）」

日本同事：「放！（欲しい）」

然後噚日派開工利是，日本同事都係要問：「點解嘅？（なんでお金をいただけるんですか？）」

我：「……咁你要定唔要？（欲しくないの？）」

日本同事：「要！（欲しい）」

唔係寸，係我嘅日文程度解釋唔到咁多，不過見到佢哋開心，我都開心。

其實我阿媽有打長途電話嚟，千叮萬囑我要派開工利是，我話有，佢問我封幾多？

我：「一萬囉！」

阿媽靜咗，我知佢諗緊乜

我：「定啲嚟，一萬Yen啫，唔係一萬港紙。」

雖然係Yen，但係同人講我封一萬蚊開工利是，嗰下都覺得自己型咗一秒……

或者我唔係好叻賺錢嘅老闆，但我希望每個幫我做嘢嘅人都開開心心，祝所有打工仔開工大吉！