一個立心不良嘅故事。
話說我隔籬部門請人，佢哋唔想出job ad，所以內部放風問同事，睇下大家有冇朋友可以介紹。咁我之前同班friend食飯講起呢單嘢，當中一個叫Jeff，同埋一個叫志江嘅朋友都話有興趣，唔緊要啦，介紹晒去interview囉！我冇理由幫一個唔幫另一個㗎嘛，由得佢哋良性競爭，反正唔係我話事請邊個。
隔籬部門個主管約咗Jeff星期五上嚟見先，志江就要星期一，所以志江喺星期五晚順理成章問下Jeff見成點？有冇咩要注意？
Jeff答得好表面，似乎不願透露太多，明白嘅，朋友還朋友，始終都係競爭緊同一份工，不過Jeff又忽然好大方分享自己開咗expected salary $25,000，仲話嗰位主管覺得好合理，志江聽完就好驚訝：「兩年經驗嗌到25k咁多？呢個post唔係唔使跑數咩？」
Jeff：「係呀，你放心嗌啦，我覺得自己嗌少咗！」
志江：「咁你估我嗌26k至27k會唔會好過份？我之前份工20k咋喎！」
Jeff：「我之前份工都係20k咁上下，而家嗌完25k都覺得蝕，你嗌高啲啦！」
因為我哋三個人差唔多年紀，工作經驗都係得兩至三年，所以大家嘅人工水平係好接近。
如是者，志江星期一上嚟我公司interview，期間Jeff打畀我，好緊張咁問志江見完未，因為佢想知道最終請邊個，而Jeff喺電話裡面向我坦白：「我做咗件好衰嘅事！」
我：「咩？你祈禱自己見得成，志江見唔成呀？」
Jeff：「唔係，其實我人工嗌22k，唔係25k。」
我：「咁仆街嘅你？我都覺得奇怪，你send畀我轉交嗰份CV，last salary得20k，冇理由咁進取開25k吖！其實你唔應該跣志江囉！佢上次係問你見成點，想知個流程同埋有咩準備啫，又冇問你人工，做咩要老作個數呢？一陣佢真係嗌25k，而原來你係嗌22k，如果interview表現差唔多實請你啦！」
中間嘅過程唔花時間描述喇，直接跳到結果。
由於我只係負責介紹朋友，有啲細節我事前係唔知，例如total要請幾多人，同埋人工上下限等等，結果……原來隔籬部門唔止請一個人，所以Jeff同志江都一齊請晒，Jeff人工如佢所願，22k approved，而志江嘅人工就係－－－26k！
志江仲要多謝阿Jeff：「好在你提我咋，我開26k，佢又真係冇問題！」
後來我先知呢個position係28k封頂，至於邊個批幾多就係由嗰位部門主管話事，所以冇一個準則，你敢開，佢又覺得你順眼，唔過28k就冇問題。
Jeff呢單嘢除咗「立心不良」，我仲諗起另外4個字，就係「奸有奸輸」，不過唔緊要啦，最終兩個都請晒，可能Jeff開得高又會被reject呢！佢知道志江有26k之後好灰呀，仲down過之前失業嘅時候。