「喂，Cynthia？我係人事部Alexa，啱啱有人打嚟話要同你做reference check，你最近係咪見緊工？」
我：「係呀，resign之後抖咗陣，呢排先開始搵，麻煩到你唔好意思。」
「唔麻煩，不過我驚影響到你，所以打嚟同你講聲先，嗰間公司個HR問啲問題好誇張喎！」
我：「請問對面問咗啲咩呀？」
「佢話想知道你為人，問你平時做嘢合唔合群？算樂觀定係經常負能量？係咪準時返工？多唔多請假？食唔食煙？有冇重大事故claim過公司保險？知唔知你有冇不良嗜好？另外仲問你有冇搞辦公室戀情？我自己聽得好唔舒服，因為都幾私人，而且佢冇乜禮貌。」
我：「咁過份？sorry，我唔知對方reference check會問呢啲。」
「唔關你事唔使sorry，佢見我唔肯點答，就叫我駁畀你前上司，咁我就問佢知唔知你前上司叫咩名？佢又答唔出，因為你approve佢做reference check應該有填form，理論上要寫contact person個名同直線，佢答唔出即係你唔想佢接觸前上司，所以我就reject咗，臨尾氣氛麻麻地，我驚影響你份新工，同你講聲先。」
真！我同前上司關係麻麻，所以reference check嘅contact person我就填人事部，好在舊公司個HR幫我把關，而且新公司呢邊問嘅問題都幾冒犯，我聽完真係好嬲。
以為舊公司HR唔肯駁去畀我前上司，呢份新工都冇下文啦！點知同日晏晝我就收到呢間新公司嘅HR電話，佢叫我星期一返工……
我：「唔返啦，你咁唔識尊重人，問完咁多私隱仲想私自搵我前上司，乜我有批准咩？你鍾意搵邊個就邊個，咁畀張form我填嘅意義係咩？」
新公司HR：「我唔覺得有問題喎！你咁大反應驚我搵你前上司，即係身有屎啦！」
我嬲到噴火，而家諗緊可以向咩部門投訴，定係直接搵呢間新公司嘅高層反映，雖然都應該冇用，因為一個HR點樣對求職者，多少反映間公司嘅文化，呢份工真係唔做都罷！
想畀返credit我舊公司個HR，一個reference check，睇到兩個HR嘅高低。