噚日《辦公室日報》IG講咗個為zoom interview開鏡頭問題搞到扯火嘅故事，由於出街之後有其他人分享視像見工嘅搞笑嘢，所以呢篇文章會嚟個大綜合，如果你已經睇咗「大話骰」個投稿，可以直接跳去下面第2 part開始睇。
第一段投稿
我係HR，安排老細同求職者用zoom見工，set好嘢諗住出返房等佢哋慢慢傾，跟住老細就問求職者點解唔開鏡頭？求職者秒答：「你唔開我咪唔開囉！」講真呢位求職者嘅語氣都幾倔，我當時都嚇咗一跳。
老細：「但你見工應該要開嚟畀我望下喎！」
求職者：「咁你開先吖！」老細扯扯地火，搞到我都唔敢出返房住，睇下有冇咩要幫手或者幫口。
老細再答：「Ok，你開先，你開完我開。」
兩個大男人為咗開鏡頭問題你一言我一語，老細50幾，嗰位求職者都30歲，開個cam啫，玩大話骰咩！開定唔開呀你哋？
求職者最終開咗鏡頭，然後老細跟住開，最爆係求職者見到老細個樣之後講咗句：「你都係熄返啦！」
老細紅都面晒，但佢冇熄鏡頭繼續in，仲示意我可以出返去，結果老細只係in咗5分鐘就出返嚟，仲即刻同我講呢個求職者唔適合。
其實喺IG出咗呢段投稿之後，即刻有另一位叫Gloria嘅讀者DM我講咗自己嘅睇法，佢認為喺呢次事件當中，求職者嘅應對明顯冇乜禮貌，但係個老細都有問題，因為Gloria話自己都係HR，佢呢兩年負責嘅所有視像interview都會主動開鏡頭，呢個係對求職者嘅尊重。
Gloria仲話，之前受疫情影響，唔少interview都係work from home嘅時候做，即使冇化妝都可以戴個口罩，因為咁樣好正常。Gloria補充，試想像係約上office見工，唔通個HR、老細，又或者Manager，會唔見人隔住個喇叭in求職者咩？不過Gloria亦強調，投稿裡面提到嗰位求職者喺表達上可以做得好啲。
唔知你認唔認同Gloria嘅睇法，以下我哋會講第二個故事，投稿人叫Jennifer。
第二段投稿
有次視像interview，用中文傾完一輪就要考下求職者嘅英語會話能力，但唔知點解嚟到呢個部分，求職者嗰邊嘅網絡就變得好差。
Manager開始先 ’So, let’s get started. I have a series of questions to ask you. At the end of the interview, you’ll have a chance to ask me additional questions about the IT management position you’ve applied for with us.’
然後求職者嗰邊定咗格，冇任何回應，其實呢條都未係問題，只係Manager開始英文對答嘅開場白。
因為我係其中一位interviewer，所以要從旁協助，問下個求職者聽唔聽到？喺唔喺度？結果隔咗5秒左右，個求職者終於「返嚟喇」，佢話唔好意思頭先可能網絡差所以窒機，然後Manager又重複一次段英文開場白，今次冇等求職者回應就展開第一條問題 ’Describe a specific situations when you assisted a new employee in your previous organization. ‘
求職者又再成個人定格，我哋係咁同佢say hello同埋問佢聽唔聽到，又係隔咗5秒，求職者先開口答：「Sorry，窒機，頭先聽唔到。」
Manager唯有再重複上述問題一次，而求職者亦再度「窒機」，明明講中文嘅時候網絡好暢順㗎喎！
Manager已經有啲唔耐煩，索性轉咗另一條短問題，似乎想慳返啖氣 ’What is your greatest strength?’ 問完之後……求職者又「窒機」，5秒後再講sorry話網絡好差，呢次Manager轉返中文講：「先生，你話窒機，但你知唔知你後面把風扇係keep住轉，個窗簾係keep住飄下飄下㗎？窒機淨係淨前面㗎？時空交錯呀？」
我諗唔使再講落去，你都知道個interview結果啦！
第三段投稿就係來自一位叫Jason嘅讀者，佢分享自己以求職者身份出席視像面試嘅鬧劇，仲send埋圖片畀我睇。
嗰次視像見工，嗰間公司有3個人一齊in我，連埋我所以畫面就變成一開四，睇得出佢哋成班人都係home office，因為個HR嘅background係自己屋企，有張BB床喺後面，個老細亦用咗個淨色background，反而係個Team Manager一嚟就嚇親我，佢個background係以下呢幅圖，個頭就喺中間黑色個空位：
我其實察覺到老細好似黑黑地面，結果我哋in咗一陣，老細真係開口爆人，不過唔係爆我，係爆個Team Manager：「呀Hubert呀！你轉一轉個背景得唔得呀？我睇得好唔舒服呀！」
然後個Team Manager仲要嘻皮笑臉話唔好意思，跟手轉咗以下呢個背景，唔知咩事勁多外國明星包圍佢，佢個頭喺最前最中間。
跟住老細又話：「好花好亂喎！有冇正常啲呀？」
個Team Manager話：「收到！」隨即轉咗以下呢個，佢個人喺中間，側邊條外國肥佬好似一直望住佢咁：
老細忍無可忍怒喝一聲：「唔in住喇！再約時間，呀Pat（個HR）你安排好再同我講，我off先。」
喂！我無辜㗎喎！我嚟見工㗎喎！唔知個Team Manager份人不嬲都係咁，還是有心想搞事，但你唔好搞著我吖！嗰次個視像interview就咁終止咗，兩日後個HR打嚟想再約我時間見工，不過我已經有其他offer喇，所以就冇再同佢哋癲，呢間公司都痴痴地！