
其實我個經歷都出現過喺你個page裡面㗎喇,因為見過有人投稿話誤投CV去老細旗下嘅公司,但我呢舖就衰得應啲,因為老細直接叫咗我入房問,我當時又冇心理準備呢,雖然最後冇事,不過唔知未來嘅日子會唔會出事。
嚴禁轉載聲明:本網站所存在的一切知識產權,屬於我們所有,或已合法地特許給我們在本網站上使用。由適用法例所授予的一切權利,茲在此予以保留。除我們給予特許外,閣下不得以任何形式及方式,創立衍生作品、下載、翻印、複製,或節錄我們的故事內容放在其他網站圖利。
老細好少打內線畀我,嗰日佢一打嚟就話:「Cyrus,你入一入嚟我房,傾兩句。」
當時我係諗做錯咗啲乜,事關佢把聲都有少少凝重。
入到房,老細叫我坐低之後就問:「Cyrus,你想轉工咩?」
突如其來咁問,我真係接唔到招,同埋我嗰排的確係搵緊工,但又冇回音,所以連請假見工嘅機會都冇,老細冇理由知吖,求職網我係用手提電話個App撳,唔係用公司部電腦上㗎喎!
我:「吓!做咩無啦啦咁問?」咩料?唔通佢識讀心?
老細:「我出面有間公司請人,收到你CV,呢間其實都係子公司嚟嘅,不過就細啲,一般同事未聽過係唔出奇,咁究竟係咩一回事啫?」
呀屌!乜咁大意呀!尷尬到無可再尷尬,我諗咗十幾秒之後都唔知應該答乜,所以就講咗個爛gag打圓場。
我:「哈,咁啱嘅,咁不如直接而家interview啦!」
我以笑遮醜,老細就冇笑,反而繼續好認真咁問落去:「有咩唔怕講喎!其實我幾滿意你嘅工作表現,做生不如做熟啦!你係咩原因想轉工先?同班同事唔夾?我見你哋平時都有講有笑呀!定係人工方面呀?大家傾下。」
講真主要係人工啦,不過我都唔想講到咁白,所以怕怕醜醜咁答咗句:「Er……都係人工啦,想試下出面啲機會。」
老細:「如果係人工就簡單啦,嗱!你呢份CV裡面個expected salary我哋畀到吖,唔係差好遠啫,加到一樣咪得囉!」
咁無論以咩角度去傾,你講到咁,我又瘀到咁,嗰一刻都一定要話得㗎啦!問心嗰句,我亦唔係好迫切性要轉工,但係嚟到2023年年中,咪係咁易睇下出面咩環境囉,一陣做到10月11月近年尾,到時係好公司都冇人走啦!
我:「哦,好,多謝你先,其實我唔係唔鍾意公司嘅,真係想周圍睇下機會啫,冇咩特別,都唔係有咩唔滿意。」
老細:「咁就好啦,你知唔知轉人好煩㗎,我又要請,又要教,教得好就話,一陣教完又走,大家都嘥時間,你轉去第二度都唔一定適應啦!」
我真係冇諗過誤投CV竟然搏到老細加人工挽留,但係嗰一刻係完全冇興奮嘅感覺,因為氣氛確實太奇怪太瘀皮喇!
我記得中學有次喺屋企用電腦睇咸片,個earphone插得唔應所以漏聲,我老母喺房出面大嗌,拍晒門問我搞咩!唔知點解同今次畀老細踢爆我搵工嘅情況有啲似,又係嗰種斷到正、好突然、冇得兜,做咗on9仔嘅感覺。
唯一分別係當年老母嬲到癲咗,但係而家老細就好溫和,仲主動加我人工。
距離呢件事發生到而家,其實已經過咗兩個星期,一切安然無恙,6月底亦都出咗新人工喇,果然有危就有機。
我有將今次經過同另一位同事分享,佢嘅睇法就比較悲觀同消極,仲話老細已經知道我有離心,將來未必會信任我,呢一刻只係未搵到人頂替。
我就覺得唔需要諗到太複雜,如果老細第日炒我都冇辦法,賠足咪得囉,或者我到時又搵到好工呢,總之今個月份糧加咗就係事實,我都冇嘢輸啦!