我做行街Sales，平時嘅工作形式係朝早返公司打卡，開個早會，跟住就出去見客，通常5點幾返office做下paperwork，6點零鐘走，當然如果好多嘢跟，有時係會開OT嘅。
一個行街Sales出咗去係咪分分秒秒都做緊嘢？又或者會唔會蛇王？因人而異啦，梗有人好勤力嘅，我自己試過辦公時間約friend食tea、陪阿媽覆診、見其他工、行街（shopping嗰種行街）、落機舖，咩都試過喇，但有次去咗睇戲，散場嗰陣你估見到邊個？係老細呀！公司最大嗰個呀！
老細身邊有個同佢差唔多年紀嘅女人，應該係佢老婆，不過都唔重要喇，佢係老細，間公司係佢嘅，走出嚟同邊個睇戲唔使交代，相反我打佢工，當時又係office hour，死得！老細唔止見到我，仲黑晒面咁睥住我，我勁驚青同佢點頭，跟住老細就拖住個女人走咗，一句嘢都冇講。
成個人心緒不寧，過咗15分鐘左右，我個Manager打嚟，知出事㗎喇，Manager喺電話度同我講：「睇戲呀？好唔好睇呀？」
我：「Sorry，見完客冇嘢做，諗住涼下冷氣……」
未等我講完，Manager就話：「老細打咗畀我喇，話要炒9你。」
衰到應一應，仲有咩好解釋吖！
然後Manager又接住講：「我話你今朝返嚟請咗半日假，晏晝係你私人時間，一陣唔好返公司喇，睇戲行遠啲吖嘛，好L鍾意觀塘呢頭呀？」
雖然佢夾雜咗粗口，但語氣並唔係兇我，而且仲包庇我。
第二日返到公司，真係冇事！但自從呢一次之後，我冇再蛇出去見工，吞pop都有嘅，不過少咗好多，睇戲直頭有陰影，好多謝Manager放我一馬，其實呢份工自由度都算好大，我同自己講要珍惜，死過翻生唯一可以做嘅係盡量跑靚條數，同埋唔係做公司嘢嘅時候遠離觀塘呢頭。