有啲人為咗P靚自己個樣，連幅相後面啲柱都P到彎晒，有時連啲牆都搞到變異度空間，不過咁樣已經唔係咩新鮮事，我公司有個女同事叫阿妍，佢絕到點呢，淨係P靚自己都算，阿妍係會特登P醜或者P老同框嘅人，我作為男人咪覺得搞笑囉，但其他女同事就好嬲。
「喂，唔係咁呀？忍你好多次喇喎！你自己post fb我唔理吖，呢啲相send去同事group，你加effect將我變咗老人家做咩呀？你當我傻定係搏我唔會睇呀？有其他area同事喺個whatsapp group入面㗎！上次我已經唔出聲，你唔好咁過份啦！」同事為P圖嗌交，我真係第一次見。
阿妍：「冇呀！我P自己之嘛，都冇搞你！」
「你係咪玩呀！我有原因㗎，張相係Ivy影，你收完張相再P完先send出同事group，不如我而家post埋張原圖啦好冇呀？」
被P到老了廿歲個女同事動咗真火，我梗係事不關己啦，因為阿妍係唔會「搞」男同事，佢淨係會P醜或者P老同框嘅其他女仔，機心好重，講真如果你冇見過佢哋真人，應該好容易就信咗，所以同事大group裡面其他分公司嘅人只會見到阿研一個靚晒，以為我哋香港office得阿妍一個靚女。
有時睇到阿妍啲相，我會以為自己公司有個新同事，而其實類似嘅情形都試過㗎喇，因為初初阿妍send resume嚟係有相，我就係因為阿妍個「靚樣」先叫佢嚟interview，好哄動㗎，HR拎住佢張form行埋嚟我個位講：「喂！有個靚女，成個韓星咁，使唔使幫你約interview？」
其他同事聽到呢一句都衝晒過嚟，不過resume始終係candidate私隱，又唔可以同大家分享嘅。然後HR幫手約咗見工，好多同事當日都金睛火眼留意有冇靚女出沒，等到放工終於有男同事忍唔住問我：「又話有條女好似韓星會嚟interview嘅，人哋放飛機呀？」
我：「今朝嚟咗啦！」
Anyway，相處耐咗，阿妍同其他女同事嘅關係的確麻麻，通常佢影相都會爭住用自己部手提電話，咩原因應該唔使解釋啦！不過你知有時同事食飯影相會好即興，例如邊個負責企最前揸機就順手用自己部電話，就好似啱啱呢次佢哋嗌交咁，阿妍又唔肯行最前揸機，話最前會影到自己最肥喎……後來有另一位叫Ivy嘅女同事影，影完之後阿妍就衝埋去話要airdrop張相，原來係趕住P圖，想由佢第一身send出去同事group，佢怕Ivy send原圖出去……
對於其他女同事嚟講，阿妍呢條女真係好恐怖呀！
我覺得女仔P圖係冇問題，我老婆都會P，P圖係不分年齡身份，問題係阿妍呢次都幾過份，P靚自己，P老同埋P醜人哋，境界同心態上係衰過嗰啲P彎後面條柱嘅人，有女同事話阿妍咁樣係心地唔好，我自己就當係一場鬧劇咁睇。
P圖冇乜問題，只係我覺得有種女仔係會將P圖後嘅自己，當成真實中嘅自己，活喺一個自我感覺良好嘅世界。不過我唔肯定阿妍係咪咁嘅人，畢竟佢只係我下屬，鬼知佢心路歷程咩！
其實HR有問過我一個問題，當日阿妍上到嚟見工，HR一度以為自己約錯人，對返資料又啱喎！我嗰次interview見到真人都嚇親，唔係話阿妍好醜，不過我望一望resume張相，再望一望眼前嘅人，一時間都覺得好迷。
結果，我請咗阿妍。HR知道咗我嘅決定之後好大反應：「詐騙都請？誠信有問題喎！」
請！點解唔請？我呢個部門係design，呢個position成日要執相，interview當日我雖然嚇親，但係見到阿妍P圖嘅技術堪稱為鬼斧神工，人都P得掂，我應該可以將client啲product相交畀佢，只係估唔到阿妍會同其他女同事關係咁差啫，理得佢哋吖，單計執相技巧，阿妍的確係高嘅！