有次做做下嘢聽到pantry傳嚟幾聲巨響，有啲人問咩事，咁我個位最近吖嘛，咪起身行入去睇囉！原來係個男同事瘋狂對住部水機又打又踢，佢見我入嚟不但冇停手，仲對住我鬧部水機：「DK個LM，唔知咩設計嚟！啲熱水彈親我，次次斟水都係咁，DKLM吖！」講完又再踢咗部水機兩腳。
平時掟電話（公司枱頭電話）、拍打keyboard、拍打影印機，仲有怒飛file都已經司空見慣，呢個男同事真係有躁狂症 ，不過佢通常係發死物嘅脾氣，唔會無端端鬧人，只係情緒大上大落都好難頂㗎嘛，正常你唔會想同佢傾計，同埋有啲情況係幾騷擾到人。
某次大家出去食lunch，間餐廳有部電視播緊MC 張天賦嘅《記憶棉》，咁冇嘢吖，食飯咪聽下歌囉！呢位男同事未停過係咁鬧個MV：「CLS！呢啲咁嘅橋段拍咗幾廿年，個女主角結婚會唔會請個EX去婚禮現場彈琴呀？On9㗎！即係你結婚然後請個前男友上台唱歌？嘩！你睇下，呢幕仲要個新娘擔埋凳仔坐喺前面聽，一路聽一路喊，Diu！當個新郎死㗎？」
我：「MV嚟啫，唔使咁認真喎！」
「低B吖嘛！個新娘啲朋友會唔知你係佢前度？會畀你入去個婚宴？」結果佢Diu足成個MV，張天賦唱歌就聽唔到喇，淨係聽到Diu嚟Diu去。
呢位睇咩都唔順眼，乜都鬧一餐嘅男同事終於有次闖禍，佢用staff card開門，話Do完之後反應好慢，度門都係要delay一兩秒先開到，結果佢一腳踢落塊玻璃門度，唔知係啲用料太差定係佢太大力啦，總之成塊玻璃碎晒遍佈一地，呢度公司正門嚟㗎！咁梗係驚動晒所有人，包括老細啦！
雖然玻璃門以外其實仲有一度閘，不過搞成咁真係唔理唔得，Admin即刻call人處理同埋搵師傅搞掂返度門，老細就嗌咗呢位躁狂同事入房。
如果唔係躁狂同事平時都叫做到嘢，我估呢件事已經足以炒咗佢，因為唔單止係度玻璃門，pantry水機都仲有佢嘅鞋印，影印機其中一個tray仲畀佢踢到有凹痕。
老細冇炒呢位同事不特止，仲安排佢去做心理治療，其實一開始我話同事有躁狂唔係矮化佢，的確係佢睇完醫生得出有躁狂抑鬱症，據聞最初只係接受一般類似心理輔導，但係大家都發覺佢冇乜好轉，一樣係照踢影印機、照掟電話、照舊拍打微波爐、照舊見到乜都Diu，差在冇再踢玻璃門㗎啫！
後來呢位同事已經要服用處方藥物，個半月前開始轉做home office，即係糧照出，工都叫做照返，不過就唔需要返公司，佢好似回到當年疫情咁，有時開會真係要人人出席先叫佢開zoom，雖然隔住個mon同埋見少咗好多，唔肯定佢病情有冇好轉，但面色的確比之前好，可能有冇躁狂症都一樣啦，唔使返office喎，心情一定好㗎！
本身冇設定一個回歸公司嘅日期，因為老細其實好支持同埋好肯幫呢位有躁狂嘅同事，諗都諗到啦！有邊間公司會唔追究一個踢爆玻璃門嘅員工？完全唔使佢賠錢，仲搵晒資料安排佢去做心理輔導，更加容許佢home office直至治療有效果，呢個老細算係咁啦！
不過老細好人，又唔代表個個容忍，躁狂同事嘅上司就覺得咁樣對其他要返office嘅人唔公平，之前已經兩度提議公司炒咗佢，結果不了了之，最近就加大力度，話躁狂同事work from home好影響工作進度同埋安排，仲話好多時突然要開會傾嘢，根本冇時間set up個zoom等嚟等去。
而家好似話老細都動搖喇，想叫躁狂同事再返公司試一試，睇下情況有冇改善，不過佢直屬上司就傾向「隔空炒人」，原因係費事見到佢發脾氣踢呢樣掟嗰樣，到時當面解僱仲麻煩喎！
雖然公司冇咗躁狂同事係多咗份安寧，但如果佢真係有病而又冇埋份工，可能情況會再惡化，算啦！話晒都唔係我條team，已經理唔到咁多，keep唔keep到份工都好，我都希望呢位同事快啲醫好自己嘅躁狂抑鬱症。