唔知大家睇咗《辦公室日報》嗰條「最唔尊重求職者行為」嘅影片未？當中有個故事係講Manager喺interview期間玩失蹤，直至5點先至醒起留低咗求職者，由於呢段投稿冇講結局，所以我呼籲當事人update後續，估唔到真係收到回覆。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
可能有啲讀者仲未睇條片，容許我喺呢度濃縮咁講下件事先，投稿人阿Lui早排去見工，嗰次已經係second in㗎喇，本身同個Manager傾得好地地，點知in咗大約20分鐘左右，Manager就畀人嗌咗出房聽個重要電話。
阿Lui留喺房痴痴的等，一等就係兩個鐘，當時係中午12點，阿Lui嘗試行出房睇下咩情況，然後有位路過嘅女職員喝佢：「你見工就唔好周圍走啦！」
被人喝當然唔開心啦，但阿Lui諗住呢次係second in，唔想前功盡廢，所以就返入房繼續等。
等到花兒也謝了，間公司啲人仲出晒去食lunch，阿Lui覺得咁都唔係辦法，所以孭袋逕自離開，直至晏晝5點，嗰位Manager終於記得阿Lui嘅存在喇！不過呢位Manager竟然仲好意思問阿Lui去咗邊……大佬呀，由朝早10:20等到你下晝5點先再現身，一句唔好意思都冇。
本身個投稿喺呢度就完咗，所以我喺影片中叫阿Lui盡量update返後續，估唔到又真係有後續，個Manager唔知係想補償定係點，真係畀咗offer阿Lui，仲叫佢兩星期後返工。
阿Lui本以為等咗咁耐都值得，起碼換到個offer返嚟，誰不知返工當日又出事，原來呢位Manager放假去咗旅行，但又完全冇同其他同事交帶有新人返工，更甚係連HR都唔知，contract又冇準備，咩安排都冇講低，你可以理解為所有嘢都係個Manager口頭承諾。
個HR雖然唔知頭唔知路，不過都帶咗阿Lui去個Manager嘅部門先，但部門裡面嘅同事完全唔知有新人返工，亦唔肯定係咪真係請咗呢位阿Lui，個個都唔知點做之下，其中一位同事就嘗試WhatsApp同埋打電話畀Manager，可惜成個朝早都冇回覆。
阿Lui就好似重演返當日見工嗰幕「孤兒仔」咁，成朝戇居居冇人理，唯一唔同嘅係second in嗰次係坐會議室，呢次就坐喺辦公室嘅一角，我突然諗起呢段歌詞：有人問我，我就會講，但是無人來。
阿Lui就係咁坐到lunch time，嗰位Manager嘅部門同事又冇嗌埋佢一齊去食晏，期間亦冇同佢講嘢，真係當佢透明，阿Lui覺得太無癮喇，趁住lunch time就順勢走咗。
去到香港時間夜晚7點，嗰位Manager終於打畀阿Lui，點解咁強調係香港時間呢？因為Manager喺電話度話自己同屋企人去咗歐洲旅行，有時差，所以先會遲咗覆HR同班同事，今次Manager有say sorry喇！
個Manager話忙得滯，口頭畀咗offer阿Lui之後忘記同HR交代，亦都冇同佢部門班手足交代，所以其他人就唔知點樣應對阿Lui喎！又強調起身後聽到msg已經即刻打長途搵阿Lui，好在摷email搵得返份CV，總算可以有電話號碼直接打嚟。
講乜都冇用，因為阿Lui已經受夠，結果就直接喺電話度同呢位Manager攤牌：「連續玩我兩次，乜都夠啦！」跟住就cut線。
第二日呢間公司個HR竟然打畀阿Lui，似乎係個Manager吩咐補鑊，而個HR都有致歉，希望阿Lui可以約個日期時間再返工，又話個Manager已經交代好晒成件事，到時會準備好contract畀阿Lui簽，亦會有同事帶住阿Lui做嘢。
阿Lui話個HR態度好好，真係好似氹小朋友咁氹，而佢都體諒HR係無辜，純粹係個Manager處理得唔好，但無論如何，阿Lui已表明唔會再返去，因為佢覺得自己冇辦法同呢位咁不負責任嘅Manager共事。
阿Lui話自己咁樣同個HR講：「大家都係打份工，大家都有阿媽生，interview佢已經浪費咗我幾個鐘，叫咗我返工又完全冇安排，你叫我第日點跟呢啲阿頭？佢嗰啲就係時間，我嗰啲唔係時間？」
做得好呀！其實見工嗰次in in下失蹤已經好唔尊重求職者，跟住呢啲Manager做嘢肯定冇運行，及早睇清楚，總好過上錯賊船。
最慶幸係阿Lui話自己已經搵到另一份工，咁就更加好啦，我聽完都放心晒！
如果未睇呢條「最唔尊重求職者行為」嘅影片，可以去以下連結睇返，裡面仲有幾個故事都好激心。
